Nextgen Kurdî babeta madeyanê hişbirî ser o Çand Amed de Forumê Ciwanan o 3. viraşt. Forum bi sloganê “Beşdarê ma bibê û vengê xo berz bikerê” ame viraştiş. Parlamenter, hemşaredar, endam û rayberê partîyanê sîyasî û sazgehê komelê sîvîlî zî tede zaf kesî beşdar bîyî.
Moderatorîya forumî Gulçîn Şanlî kerd. Hemşaredara Sûrî Fatma Gulan Onkol, Hemverfeka Komîsyonê Kultur, Ziwan û Hunerî ya DEM Partî Cemîle Turhallî, Hemserekê Komela Psîkologanê Mezopotamya (DER-MEZ) Murat Burtakuçîn û Temsîlkarê Merkezê Cigêrayîşan ê Warî (SAMER) Serhat Temelî babeta “Madeyê hişbirî: Remayîş o, sitargeh o yan zî vengdayîş o?” ser o qisey kerd.
‘Ganî piştîdayîşê psîkolojîk û komelkî bêrê dayene’
Hemserekê DER-MEZê Burtakuçîn vat: “Şuxulnayîşê madeyî bi vejîyayîşê serotonîn û dopamînî na rewşe hetê bîyolojîkî ra zî piştî dano û nîşan dano ke na girêdayîye sey nêweşîyêk yena vînayene. Coka tedawîya girêdayîye tena fîzîkî nîya; ganî bi piştîdayîşê psîkolojîk û komelkî zî bêro îdarekerdene. Bi taybetî girêdayîye zaf rey emrê gedeyîye de dest pêkena.”
‘Emrê şuxulnayîşê madeyî kewt 5 serran’
Hemverfeka Komîsyonê Kultur, Ziwan û Hunerî ya DEM Partî Cemîle Turhallî wina qisey kerd: “Heme Tirkîya de şuxulnayîşê madeyî goreyê nîjadîyetî zêdêr yeno vînayene û bi taybetî mîyanê kesanê ke ameyoxê înan kêm o, hîna zaf vila bîyo. Goreyê cigêrayîşanê serra 2025î emrê destpêkerdişê şuxulnayîşê madeyî kewtê 5 serran.”
‘Erxenî de nameyê “gedeyê tûtinî” yeno şuxulnayene’
Temsîlkarê Merkezê Cigêrayîşan ê Warî Serhat Temel vat: “Goreyê îstatîstîkanê 1.500 ciwanan ê zaf şaristanan, emrê şuxulnayîşê madeyî kewt binê 10 serran. Formo tewr erzan ê madeyê bi gazê adirgeyî dest pêkeno. Erxenî de mîyanê tayê ciwanan de nameyê ‘gedeyê tûtinî’ yeno şuxulnayene. Teşwîqkerdişê şuxulnayîşê madeyî sebebê kêmbîyayîş yan çinbîyayîşê alternatîfan bi nisbetê nêzdîyê se ra 85 yeno dîyarkerdene.”
Hemşaredara Sûrî Fatma Gulan Onkol vat ke sey Şaredarîya Sûrî seba vernîgirewtişê şuxulnayîşê madeyî atolyeyî û çalakîyê cîya-cîyayî rêxistîn kenê û nê atolyeyan de behsê girêdayîye û çareserîyanê ci kenê.
Forum bi pers û cewaban qedîya.
