Cenazaya Fehîm Tosunî ke sînorê Îranî yê dewa Elbes a qezaya Elbak de amebi kiştene, 3 rojî yo cayo ke tede ameyo gulebarankerdene, yena vindertene.
Cenazaya Fehîm Tosunî ke dewa Elbes a qezaya Elbak a Wanî de sînorê Îranî ser o 3 rojî ra ver sereyê xo ra amebi gulebarankerdene û kiştene, hema zî nêameya hewanayene. Hîrê rojî yo yeno pawitene ke dozger û pisporê mayînan şêrê cayê hedîse. Keye û dewijê Fehîm Tosunî seba girewitişê cenaza paweyê eşkerayîyêk ê. Dewijî dîyar kenê ke vizêr pisporê îmhakerdişê bombayan reyde bi estoran ver bi cayê cenaza kewtê rayîr. La rîyê vayo vêş û vewre ra, pisporan nêşinayo bixebitîyê û cenaza hema zî uca de vinderte ya.
