MED TUHAD-FED’î derheqê binpaykerdişanê heqanê hepisxaneyan awanîya xo de kombîyayîşêk viraşt. MED TUHAD-FED’î qalê binpaykerdişanê heqan û zextanê hepisxaneyan kerd û waşt girewteyê nêweşî bilez berê veradayene. MED TUHAD-FED’î da zanayene ke seba ke Rayberê Şarê Kurdî Abdullah Ocalan reyde pêvînayîş bikerê muracate Wezaretê Edaletî kerdo.
Federasyonê Komela Huqûq û Paştîdayîşî yê Keyeyanê Girewte û Hukumwerdoxan reyde ê Medî (MED TUHAD-FED) derheqê binpaykerdişanê heqan ê hepisxaneyan û prosesêko est o awanîya xo xo ya qezaya Yenîşehîr a Amedî de kombîyayîşêkê çapemenî viraşt. Hemserekê MED TUHAD-FED’î Kerem Canpolat û Pinar Sakik Tekîn kombîyayîşî de qisey kerd. MED TUHAD-FED’î kombîyayîş de bale ante binpaykerdişê heqan û zextanê hepisxaneyan ser o û da zanayene ke seba ke Rayberê Şarê Kurdî Abdullah Ocalanî reyde pêvînayîş bikerê muracatê Wezaretê Edaletî kerdo.
Eşkerayî de bale ante rewşa girewteyanê nêweşan ê zindanan ser o û seba zextê serê zindanan bêrê vindarnayene bi hewayêko resmî Rayberê Şarê Kurdî Abdullah Ocalanî reyde pêvînayîş bikerê muracatê Wezaretê Edaletî kerdo.
‘Ma hêvîdarê ke no proses dewam bikero’
Kerem Canpolat ke ewilî qisey kerd, bale ante prosesê “Aştî û Komelê Demokratîk” ser o û vat: “No proseso ke welatê ma de dest pêkerdo, bi taybetî Rojhelatê Mîyanên ke ewro şerê Amerîka-Îsraîl û Îranî ke dewam keno, wayîrê manayêko gird o. Proseso Tirkîya û Vakurê Kurdîstanî de dest pêkerdo û dewam keno, wexto ke baş û zernên de dest pêkerdo. Ma hêvî kenê ke no proses dewam bikero. Ganî astengî û xetemîyayîşê vernîya nê prosesî, hetê hukmat û dewlete ra rast bêrê wendiş; heto pozîtîf û aştîye ra bêrê erjnayene û seba qonaxo dîyin, ver bi rêzgirewtişê heqan gamî bêrê eştene.”
‘Zindanan de binpaykerdişê heqanê merdiman dewam kenê’
Kerem Canpolatî vera binpaykerdişanê heqan ê ke hepisxaneyan d qewimîyene, nerazîbîyayîş mojna û wina domna: “Çiqas dewlete vaja ma proses domnenê zî, zindanan de zext û zehmetî û bimpaykerdişê heqanê merdiman dewam kenê. Nêzdîyê şeş aşmî yo zindananê Tirkîya û Kurdîstanî de çîyê nebaşî qewimîyenê. Ma nê çîyanê nebaşan tena sey kemanîyanê îdareyî nêvînenê; ma vanê ke no nêzdîbîyayîşo sîstematîk o û hetê dewlete ra yeno rayra berdene. No zî ma derheqê prosesî de fîneno mîyanê şik û fikaran. Komelê ma hepisxaneyan ra eleqedar o, bi hezaran girewteyê azadîye û bi se hezaran keyeyê înan est ê. Tarîxî na seserre de dewlete her tim kurdî xapênayê û sozê xo nêardê ca, aye ra gumanê ke est ê zêde benê. Zindanê Erzirom, Qeyserî, Xarpêt, Kurkçularê Edene û Amedî de tedayê girdî est ê. Heqê weşîye û însanî yê girewteyan yenê astengkerdene.”
Kerem Canpolatî dîyar kerd ke bingeyê prosesî zindanan de yo û qiseykerdişê xo wina qedêna: “Girewteyê azadîye seba keyeyanê ma û komelê kurdî xetêka sûrî yê. Ma wazenê dewlete û pêroyî sîyasetê Tirkîya na xeta sûre fehm bikero û bi hurmet nêzdîyê girewteyan bibê. Sewbîna zî girewteyê ke cezaya înan qedîyaya, bi manayê qijan û teberê qanûnî hetê heyetî ra nêyenê veradayene; înfazê înan di, çar, yan zî şeş aşmî yenê taloqkerdene û veşnayene. Ganî dewlete bilez na neheqî çareser bikera û girewteyê ke cezaya înan qedîyaya azad bikera. Girewteyê ke bi serran zindanan de mendê, eke bêrê veradayene eşkenê teber de seba prosesê û komelî hetkarîyêka girde bikerê.
Seba pêvînayîşê Abdullah Ocalan muracat kerd
Pinar Sakik Tekîn zî îfade kerd ke her çend prosesêo est o dewm bikero zî no hepisxaneyan ser o tesîr nêkeno û da zanayene ke seba Rayberê Şarê Kurdî Abdullah Ocalan reyde pêvînayîş bikerê muracatê Wezaretê Edaletî kerdo. Pinar Sakik Tekîn vat ke hepisxaneyan de bi hewayêko sîstematîk çîyê kêfî yenê kerdene û vat: “Ewro girewteyê nêweş ê giranî yê emirdergî bi israr zere de yenê girewtene. Sey sazgeh, ma çend reyan na babete viste rojevê wijdanê raya pêroyî û ma çiqaa vengdayîşê rayedaran kerd zî, çi heyf ke na rewşe hema zî dewam kena.”
‘Ganî girewteyê nêweşî bilez bêrê veradayene’
Pinar Sakik Tekîn bale ante rewşa Mehmet Edîp Taşar ê ke vizêrî hepisxaneyê Silîvrî de cuya xo ra bi ser o û wina dewam kerd: “Xeylê embazê bînî zî eynî rewşe de yê. Mehmet Emîn Çam est o; o zî bi eynî hewayî nêweş o, rewşêka winasîne de yo ke êdî keyeyê xo nas nêkeno û emrê ey zêdeyê 70 o. Reyna ma eşkenê Fîkrî Tûglûk sey nimûne bidê mojnayene. Fîkrî Tûglûk nêzdîyê 30 serre hepisxane de mendo û ame veradayene. Hemrayê ma yê ke bi raporê doktoran o ke “nêeşkeno hepisxane de bimano” amebi veradayene reyna ame girewtene. Sebeb çî yo? Seba ke doktoran no rapor o muhîm nêda, embazê ma reyna ame girewtene. Bi nê hewayî zaf embazê ma est ê ke ma eşkenê nimûne bidê mojnayene. Mendişê nê merdiman zere de, sîyaset ra wetêr û bêşik rewşêka winasîn a ke nêyena qebulkerdene. Nê wextî de ke ganî ATK bi çimdarî û ewnayîşê xo yê mîyanê sîstemê huqûqî de hetkarîya adil bikero, çi heyf ke ewro bi nêzdîbîyayîşê xo yê kêfî, nêzdîbîyayîşê xo yê binê nameyê “dosyaya terorî” de bi helwêste xo yê hetkar û cîyawaz benê sebebê vejîyayîşê tabloya nêbaşe. Nê semedî ra ganî girewteyê nêweşî bilez bêrê veradayene.”
