Komîserê Berz ê Koçeberan ê Neteweyanê Yewbîyayeyan (NY) Berhem Salihî eşkera kerd ke rîyê şerê Rojhelatê Mîyanênî ra bi mîlyonan kesî koçber bîyê û înan rê hetkarîya lezgîne ya komelê mîyanneteweyî lazim a.
Komîserê Berz ê Koçberan ê Neteweyanê Yewbîyayeyan Berhem Salih rîyê tesîrê şerê Rojhelatê Mîyanênî ra vengdayîşêko lezgîn bi rayîrê Reutersî komelê mîyanneteweyî rê kerd û vat: “Rêxistina Komîsyonê Berz ê Koçberan rê seba çareserkerdişê krîzê penaberanê Îran û Lubnanî tewr kêm 69 mîlyon dolar lazim o.”
Bi mîlyonan kesî ca û waranê xo ra bîyê
Sewbîna Berhem Salihî eşkera kerd ke rîyê şerê Rojhelatê Mîyanênî ra nêzdîyê 3.2 mîlyon kesî bêçare mendê ke Îran ra koçber bibê. Sewbîna Lubnan de zî zafêrê 1 mîlyon kesî koçber bîyê ke se ra 17ê înan welatijê Lubanan ê.
Welatê serdestî muhîmîye danê butçeya şerî
Goreyê vatişanê Berhem Salihî welatê serdestî zaf muhîmîye danê butçeya şerî û dîyar kerd ke alîkarîyê welatanê serdest bi taybetî zî hetkarîya Amerîka zaf kêmî bîya.
Komîserê Berz ê Koçberan ê Neteweyanê Yewbîyayeyan Berhem Salihî da zanayene ke hûmara koçberan a dinya xeylê vêşî ya û tewrê ney zî hetkarîyê merdimî bi temamî kêmî bîyê. Salihî vat ke na rewşe zî kena ke krîzo nikayên xorinêr bibo, ard vîrî ke lazimtî bi mudaxaleya lezgîne ya komelê mîyanneteweyî est a.
