AVKAMED a Şaredarîya Amedî ya Şaristanê Girdî derheqê çîyanê qijan ke kewenê vernîya mazgalanê awe yê kanalîzasyonî û mazgalan xetimneno bi lehçeya kirmanckî û kurmanckî dîmenêk pare kerd û vat: “Çîyê qijî kom benê û benê tofanêko gird.”
Mudirîyetê Karûbaranê Awe û Kanalîzasyonî (AVKAMED) yê Şaredarîya Amedî ya Şaristanê Girdî derheqê mendeyanê ke mazgalanê awa kanalîzasyonî xetimnenê û benê sebebê weriştişê laserî bi lehçeya kirmanckî û kurmanckî yê Kurdkî dîmenêk pare kerd.
‘Pawitişê şaristanî berpirsiyarîya ma hemînan a’
AVKAMED da zanayene ke mendeyê qijî ke yenê eştene, wexto ke varan vareno mazgalanê awe xetimnenê û dîyar kerd ke mazgalê xetimîyayeyî zî nêeşkenê vernîya weriştişê laserî bigîrê. AVKAMED da zanayene ke şaristan de seba cuyêka arame berpirsyarî kewena serê milê heme welatijan û waşt ke nê warî de hesasîyet zêde bibo.
