Hêrişê asmenî yê Amerîka û Îsraîlî yê serê Îranî dewam kenê. Roja îne û destê sibayî şemeyî de bi desan cayê Rojhelatê Kurdîstanî û Îranî ameyê bombarduman kerdene.
Îsraîlî eşkera kerd ke ey do hedef girewtişê sazgehanê atomî û merkezê endustrî bidomnê.
Roja 28ê şerî de Rojhelatê Kurdîstanî şaristanê Kirmanşan, Loristan û Urmîye bîyê hedefê bombardumanî.
Kirmanşan de tewr tay hîrê reyan mîyanê şaristanî û nêzdîyê merkezê Fermandarîya Supayê Pasdaran ame pirodayene.
Hetkarê Walîyê Kirmanşanî Behram Suleymanî eşkera kerd ke taxa Çîyagilane zêdeyê 10 banan ameyê rijnayene û netîce de 6 kesî canê xo ra bîyê û 56 kesî zî birîndar bîyê.
Sewbîna zî dewa Karxaneyê Kengewerî de zî 7 kesî ameyê kiştene.
Şaristanê Urmîye de awanîyêk û kampê El-Mehdî yê Pasdaran ameyê bombarduman kerdene.
Loristan de zî merkezê îrtîbatî yê radyoyî ame hedefgirewtene ke bî sebebê birnayîşê têkilîyanê yê cayan.
Girewteyê Îlam û Urmîye
Wezaretê Îstîxbaratê Îranî 8 kesî Mahabad, Çaldiran, Urmîye û Mîyanduabe bi îdiaya “Ajanîya seba îsraîlî girewtê.
Şaristanê Îlamî de zî Supayê Pasdaran 51 kesî bi îdiayê cîyayan (sey protesto, girewtişê rayan û erşawitişê vîdeoyan yê medya rê ) ameyî girewtene.
Rêxistinê heqanê merdiman vanê nê girewteyî bê belge û bê bingeyê û zafê înan zî girewteyê sîyasî yê verê yê.
Sazgehê atomî û endustrî bîyê hedef
Tehran de taxê sey Narmek, Zeferanîye, Ekbatan, Pasdaran û dorûverê Teyaragehê Mehrabadî ameyê bombarduman kerdene.
Şaristanê Îsfehanî de zêdeyê 10 cayan ameyê hedef girewtene.
Merkezê endustrîyê pola yê Îsfehan û Hûzîstanî ame rijnayene ke berardişê polayî ameyo vindarnayene.
Sewbîna zî îstasyonê elektrîkî yê Îsfehanî bi fuzeyan ame bombarduman kerdene.
Merkezê Endustrîyê Atomî yê Arake û Îstasyonê Xendabe bîyê hedefê hêrişan.
Artêşa Îsraîlî dîyar kerd ke no kargehê platînyûmî seba çekanê atomî berardene û çimeyêko gird ê ameyeyî yo.
Yezd de zî kargehê berardene “keko zerd” ame bombarduman kerdene ke madeyo sereke yê zengînkerdişê uranyûmî yo.
Rewşa radyasyonî
Şaristanê Qumî de netîceyê bombardumanê dorûverê Perdisanî de 15 kesî canê xo ra bîyê.
Sewbîna zî Tebrîz, Merend û qeraxê Bûşehrî zî tayê kampê leşkerî ameyê pirodayene.
Ajansê Mîyaneteweyî yê Enerjîya Atomî (IAEA) eşkera kerd ke Îranî ey hêrişeko newe yê serê îstasyonê atomî yê Bûşehrî agahdar kerdê.
Mîyanê nê 10 rojan de hêrişê 3. yo ke serê na îstasyona IAEA’yî teyîd kerd ke heta nika tu vilabîyayîşê radyasyonî nêqewimîya yo.
