Amed de pêşengîya MEBYA-DER’î de bi munasebetê “Hewteyê Qehremanî” zîyaretê mezelanê kesê ke têkoşînê azadîya şarê kurdî de cuya xo ra bîyê ameyê vîrardene. Hemsereke MEBYA-DER’î yê Amedî Ramazan Dengiz ard ziwan ke eke prosesê çareserî ameyo na aste bi saya cangorîyan o.
Bi pêşengîya Komeleya Yewîya Kultur paştîdayene û Hetkarîya Keyeyanê ke Derguşa Medenîyetî de Merdimê Xo Vîndî Kerdê (MEBYA-DER) yê Amedî bi munasebetê “Hewteyê Qehremanî” zîyaretê mezelanê kesê ke têkoşînê azadîya şarê kurdî de cuya xo ra bîyê ameyê kerdene. Zîyaretê goristanan de endam û rayberê DBP û DEM Partî, TUHAY-DER, Dayîkê Aştî û xeylê kesî amade bîyê. Seba kesê ke têkoşînê azadîya şarê kurdî de cuya xo ra bîyê deqîqeyêk rêz ame girewtene û dimayê rêzgirewtene sloganê “Şehîd namirin” ameyê berzkerdene.
Hemsereke MEBYA-DER’î yê Amedî Ramazan Dengizî yew qiseykerdiş kerd û ard ziwan ke “Eke prosesê çareserî ameyo na aste bi saya cangorîyan o. Tarixê şar û neteweyande xeylê kesayetê vejîyayê meydan û bîyê sembolê şarî. Tarixe de mîsalê winayînî zaf zêdeyê. Mîyanê şarê kurdî de Kawayo asinkar est o. Reyna şima zî zanê ke 12 îlona 1980î de derbeyêko gird virazîya çiqas kêna û xortê Kurd ê şoreşgerî bî heme eştî zîndanan.
21yê Adara 1982î de Mazlum Dogan vera nê zulm û îşkenceyî sere wedart. Xoverdayîşê Mazlum Dogan û hevalanê tesîrêko gird serê şarê Kurdî de kerd.”
Ramazan Dengizî qiseykerdişê xo de Mazlum Dogan û Egîdan ra heta nika heme cangorîyanê azadîye bi hurmet yad kerdî û vat ke ewro ma saya nê cangorîyan ra ameyî asta prosesê çareserîye.
