Dayîkê Aştî, bi munasebetê Roja Dayîkan bi sloganê “Dîyarîya tewr girde ya seba dayîkan aştîya” Amed, Stenbol, Wan û Şirnax de verê berê hepîsxaneyan de eşkerayî dayê.
Meclîsê Dayîkanê Aştî, bi munasebetê Roja Dayîkan xeylî merkezan de verê berê hepîsxaneyan de eşkerayî da. Dayîkan bi sloganê “Dîyarîya tewr girde ya seba dayîkan aştîya” ameyê têhet. Xeylê dayîkî, temsîlkarê partîyanê sîyasî û rêxistinanê komelî yê sivîlî beşdarê eşkerayîyan bîyê.
AMED
Meclîsê Dayîkanê Aştî yê Amedî çarçewaya “Heqê Hêvîye” verê berê Hepîsxaneyê Amedî yê tîpî D de eşkerayî da çapemenî. Parlamenterê Partîya DEM’î yê Adalet Kaya û Serhat Eren, Hemşaredara Amedî ya Şaristanî Girdî Serra Bucak, hemşaredarê merkez û qezayanê Amedî, hemserek, endam û temsîlkarê partîyanê sîyasî û sazgehanê sîvîl beşdarê eşkerayîye bîyî. Dayîkan pankarto ke ser o “Seba dayîkan dîyarîya tewr girde aştîya” akerd û sloganê ‘Biciwîyo xoverdayîşê zindanan’ û ‘Biciwîyo xoverdayîşê dayîkan’ berz kerd. Eşkerayîya bi tirkî dayîkê aştî Hanîfe Akpolatî wend. Eşkerayî badê çepik û sloganan qedîya.
ÊLIH
Dayîkê Aştî ya Êlihî bi munasebeta Roja Dayîkan, waştişê azadîya fîzîkî yê Rayberê Şarê Kurdî Abdullah Ocalan û heme girewteyanê sîyasî kerd, qezaya Qubînê ya Êlihî de eşkerayîye da. Rayber û endamê Partîya DEM’î û DBP’î yê Êlihî, TUAY-DER, MEBYA-DER, TJA, DÎAY-DER, Komeleya 78î û Endamê Komeleya Dayîkê Aştî û xeylî kesî beşdarê eşkerayî bîyê.
Dayîkê Aştî Nûran Seçkîn nameyê Dayîkanê Aştî yê Êlihî ser qisey kerd û wina vat: “Werekna ewro cayê panzêran de, bi gulan biameyne vernîya dayîkan. Ma dayîkî seba ke kesêk nêro kiştene, ameyê tîya û tu tang û top nêeşkenê ma vindarnê. Werekna ewro gedeyanê ma, ma rê gulî biardêne. Ma ewro gulî nêardêni verê berê hepîsxaneyan û nêberdênê mezelê înan ser.”
ŞIRNEX-MÊRDÎN
Endamê Meclîsê Dayîkanê Aştî yê Şirnex û Mêrdînî bi sloganê ‘dayîkî aştî wazenê’ verê berê Hepîsxaneyê Tîpê T ê Şirnexî de eşkerayî da. Eşkerayîye de pankartê ‘Dîyarîya tewr girde seba dayîkan aştîya domdar a’ ame akerdene.
Eşkerayî de verfekê Meclîsê Dayîkanê Aştî yê Şirnexî Behîye Nayir dîyar kerd ke dayîkê kurdan tu wext rojêka rinde nêdîya û wina vat: “Ma rojê heme dayîkanê zerrîvêşayeyan pîroz kenê. Ma roja xo de aştî, azadî û edalet wazenê.”
Verfekê Meclîsê Dayîkanê Aştî yê Mêrdînî Gurbet Tekîn zî bale ante heqê hêvîye yê Rayberê Şarê Kurdî ser û wina vat: “Ewro Roja Dayîkan a û ma na roje heme dayîkan rê pîroz kenê. Dayîkê ma ewro bi zerrîyêka vêşaye na roje pîroz kenê. Wa Roja Dayîkan biba roja aştî, azadî û edaletî. Serekê Şarê Kurdî Abdullah Ocalanî seba aştî gamêka girde eşte, la dewlete wezîfeyê xo bi ca nêard. Rayber û rêxistinê kurdan wezîfeyê xo bi ca ard. Êdî wextê game eştişî dewlete yo.”
Parlamentera DEM partî Newroz Uysal zî îfade kerd ke azadîya Rayberê Şarê Kurdî Abdullah Ocalanî azadîya heme girewteyan û şarê kurdî ya.
Badê qiseykerdişî eşkerayî, bi çepik û tîlîlîyan qedîya.
WAN
Meclîsê Dayîkanê Aştî yê Wanî bi munasebetê 10ê Gulane Roja Dayîkan seba ke waştiş û hêvîyanê xo yê derheqê “Prosesê Aştî û Komelo Demokratîk” de bi sloganê “Seba dayîkan dîyarîya tewr girde aştîya” verê kampusê Hepîsxaneyê Wanî de eşkerayî da. Xeylî endamê Meclîsê Dayîkanê Aştîye yê Wanî, endam û temsîlkarê sazgehanê komelî, Parlementerê Partîya DEM’î yê Wanî û xeylî welatijî beşdarî eşkerayîye bîyî.
STENBOL
Înîsîyatîfê Dayîkanê Aştî yê Stenbolî seba azadîya Rayberê Şarê Kurdî Adullah Ocalanî verê Hepîsxaneyê Cinîyan ê Bakirkoyî de eşkerayî da û vat: “
Roja Dayîkan do bi akerdena beranê hepîsxeneyan bêro pîrozkerdene.”
Bi munasebetê Roja Dayîkan, Înîsîyatîfê Dayîkanê Aştî yê Stenbolî bi waştişê azadîya Rayberê Şarê Kurdî Abdullah Ocalanî verê Hepîsxaneyê Cinîyan ê Bakirkoyî eşkerayî da. Endamê Înîsîyatîfî, rayberê Partîya DEM’î ya Stenbolî, Parlementerê Partîya DEM’î û xeylî kesî beşdarê eşkerayîye bîyî. Pankartê “Dayîkan rê dîyarîya tewr rinde aştîya, bi Rayberîyê azadî rê pêameyîş” ame akerdene.
‘Ganî qanûnî bêrê viraştene’
Ewilî Dayîkê Aştî Sultan Bozkurt qisey kerd û vat: “Prosesî ser o serrêke vîyart la hema gamêke nêameya eştiş, tena hetê Kurdan game eşte. Cinîyan ser o polîtîkayê taybetî yenê rayraberdene. Cinî her serre Roja Dayîkan de verê hepîsxaneyan de yê. Ganî girewteyî bêrê veradayene. Bawerîya ma înan ra çin a. Ez vengî Serekkomarî kena, wa gamî bêrê eştiş. Demo ke birêz Abdullah Ocalan ame girewtene, grûbêk gerîla koyan ra amebî ameyê girewtene. Vanê wa gêrîla bêrê, na rewşe de gerîla senî bêrê? Ganî qanûnî bêrê viraştene. Ma dayîkî nê çî wazenê. Ma wazenê Rojê Dayîkan pîroz bikerê la vere hepîsxaneyan de ney.”
‘Berê hepîsxaneyan abê do Rojê Dayîkan zî bêro proîzkerdene’
Dayîkê Aştîye Emîne Erbek zî îfade kerd ke ey wazenê berê hepîsxaneyan abê û wina vat: “Roja Dayîkan ganî verê berê hepîsxaneyan de nêro pîrozkerdene. Ma wazenê sey heme şaran azad biciwîyê. La Serekê ma azad nêbo ma zî azad nêbenê. Ma bi Serekê xo azad benê Berê hepîsxaneyan abê do Roja Dayîkan zî bêro pîrozkerdene.
Eşkerayî badê qiseyan qedîya.
