Merdimê Vîndîbîyayan û Şubeyê ÎHD’yê Amedî çalakîya xo yê hewteyê 900.de dîyar kerd ke heta ke aqûbetê merdimanê înan ê ameyê kiştene û vîndîkerdene nêro dîyarkerdene do têkoşînê xo bidomnê. Beşdaran zî dîyar kerd ke lazim o rayedarî cewab bidê têkoşînê heqdare yê keyeyan û ganî dewlete bi cînayetanê faîl nedîyar rî bi rî bêro û ozrê xo biwazo.”
Merdimê vîndîbîyayan û Şubeyê Komeleya Heqanê Merdiman (ÎHD) a Amedî verê Abîdeyê Heqê Cuye yê Parka Koşûyolû yê qezaya Rezan ê Amedî de hewteyê 900. de çalakîya xo ya “Wa vîndî bêrê vînayene û faîlî bêrê muhakemekerdene” viraşt. Merdimê Vîndîbîyayan, endam û rayberê ÎHD’yê Amedî, Meclîsê Dayîkanê Aştî, Hemşaredara Amedî ya Şaristanê Girdî Serra Bûcak, parlamenterê DEM Partî û CHP’î temsîlkarê sazgehanê sivîlî û partîyanê sîyasî mîyan de xeylê kesî tewrê çalakî bîyî. Çalakîya nê hewteyî de aqûbetê Mehmet Can Ayşîn yê ke 7ê gulana 1994 de dewa Sîseyî yê qezaya Licê yê Amedî de ameyo vîndîkerdene ame persayene. Çalakî de fotografê vîndîbîyayan û ê Mehmet Can Ayşîn ame girewtene.
Çalakî de ame waştişi ke rayedarê dewlete goş bidê înan berpirsyarîya xo qebul bikerê û ozrê xo biwazê. Çalakî dimayê deqîqeyêk roniştişî ra qedîya.
