Bendawa Devegeçîdî ke serra parîne ziwa bîbî seba şilî zêde varaya pirr bîyo û no zî citkaran û şarê dorûverî kêfweş kerdo.
Emserr sere de Vakurê Kurdistanî û pêroyê Kurdîstanî de zimistan bi şilî derbas bî. Varayîşê varanî û vewre tesîrêko pozîtîf serê zêdebîyayîşê awe kerd û serra bêawe pey xo de verda. Semedê ke emser şilî zêde bî awê hênî û çeman ameyê û gol û bendawî pirr bîyê. Serranê vîyarte de xeylê bendawe û golan seba citkarî hema vajê ziwa mendêne. Yew nê gol û bendawan ra zî Bendawa Devegeçîdî yê dewanê qezaya Peyasê Amedî bî.
Semedê şilîya zêdî Bendawa Devegeçîdî pirr bîya û sewîyeyê awe vejîyaya tewr cor. Bendawa ke serra parî de ziwa bîbî emser pirrî yê û naye zî kêfê citkaran û şarê herême ano.
Bendawa Devegeçîdî ke sey derya xo dano mojnayene, pêlê ey danê qerax ro û yew mijdîyana wedaritişê ziwaserre mojneno.
