Heyetêkê rayberîya YPJ’yî bi amancê qiseykerdiş û dîyalogî şi Şam û rayedaranê Hukmatê Demkî yê Sûrîye reyde ame têhet.
Heyetê Yewîneyanê Pawitişî yê Cinî (YPJ) ke tede fermandarê sey Rohilat Efrîn û Sozdar Hacî est ê, Şam de munaqeşeyî muhîmî kerdê. No kombîyayîş seba ke kanalê dîyalog û koordînasyonê mîyanê her di hetan hîna xurt bibê, ame viraştiş.
Heta nika derheqê asta temsîlîyetê Hukmatê Demkî yê Sûriye agahîyêka zelale nêameye girewtiş. Labelê çimeyan dîyar kerd ke munaqeşeyî hîna zaf hemrêzîya koordînasyonê potansîyelî ser o û resnayîşê mîyanê hetan de bîyê. Yeno pawitiş ke YPJ do derheqê netîceyê nê pevînayîşan de eşkerayîyêka hîra bida.
Tewrê pêvînayîşan ecizîye zî est a
Nê pêvînayîşê mabênê Rayberîya Xoser û Hukûmetê Şamî de sey nîşaneyêka pozîtîfe yenê vînayene. Labelê goreyê agahîyan, derheqê statuyê YPJ’yî de hema ecizîyêka girse est a. Şam nêwazeno YPJ daxilê artêşê Sûrîye biba û vera ney zî astengîyan virazeno. Rayberîya Xoser zî na rewşe sey “xeta sûre” vînena.
YPJ wazena sey tûgayêk artêşî de ca bigîro
Pêvînayîşan de şeklê tewrbîyayîşê YPJ’yî yê mîyanê artêşa Sûrîye û dewamkerdişê estbîyayîşê YPJ’yî bo bêra erjnayene. YPJ îsrar kena ke wa mîyanê artêşê Sûrîye de sey tûgayêk cayê xo bigîro. Labelê Hukmatê Şamî heta nika hemverê tewrbîyayîşê cinîyan ê mîyanê artêşî de vejîyayo. Goreyê xebera North Pressî, YPJ do derheqê na babetî de eşkerayîyêka hîra bida şarî.
