Haşdî Şabî dîyar kerd ke qezaya Qaîme ya şaristanê Enbarî de hemverê kampê Lîwaya yê 45. hêrişêko hewayî virazîya. Netîceyê hêrişî de 6 kesî ameyê kiştene û 4 kesî zî birîndar bîyî.
Goreyê eşkerayîya fermî ya Haşdî Şabî, sere sibayî, qezaya Qaîme ya ke girêdayeyê Enbarî ya, kampê Lîwaya 45. rastê hêrişêke hewayî ame. Haşdî Şabî eşkerayîya xo de Amerîka û Îsraîlî sey berpirsîyarê nê hêrişan dîyê. Ame dîyarkerdene ke netîceyê bombabaranî de 6 endamê Haşdî Şabî cuya xo ra bîyî. Mîyanê nê 6 kesan de ê ke Wezaretê Pawitişî yê Îraqî de ca gênê, ê zî est ê. Sewbîna hêrişî de 4 endamê bînî zî birîndar bîyî û seba dermankerdişî ameyê sewqkerdene.
Hêrişê sînorî ser o zede benê
Qezaya Qaîme ya ke sînorê Îraq û Sûrîye de ya, nê wextanê peyênan de xeylî rey bena warê hêrişanê winasîyan. Her çend Haşdî Şabî Amerîka û Îsraîlî berpirsîyar vîno zî, heta nika hetê nê her di dewletan ra derharê hêrişan de tu eşkerayîyêka fermî nêameya dayîş.
