Goreyê xebera rojnameyê The Timesî yew belgeyo dîplomatîk ê îstîxbaratê Amerîka û Îsraîlî; Lîdero Dinî yê Îranî Mucteba Xameney bêhiş mendo û koma de yo.
Goreyê xebera The Timesî; belgeyo dîplomatîk ke welatanê Kendawe reyde zî ameyo parekerdene, Mucteba Xameney şaristanê pîroz ê Şîayan Qûm de, yeno dermankerdene. Ame eşkerakerdene ke rewşa ey zaf giran a û nêeşkeno beşdarê girewtişê qeraranê rayberîya rejîmî bibo. Her çend rayedarê Îranî vanê ke o serê karê xo de yo zî, destpêkê şerî ra heta nika tu dîmen yan zî vengê ey nêameyo weşanayene. Na rewşe bena sebebê vengîya îqtîdarî û persê “gelo nika kam welatî îdare keno?” hîna zêde benê.
Gelo Kontrolê Îranî destê pasdaran de yo?
Mucteba Xamaney dimayê mergê pîyê xo Elî Xamaney ke 28ê sibate de hêrişê Amerîka-Îsraîlî yê vera Îranî de amebi kiştene, amebi îqtîdar. La yeno vatene ke o çend hewteyo ke nêeşkeno welatî îdare bikero. Na yewe gumanan zêde kena ke nika kontrolê de facto yê Îranî destê Pasdaranê Şorişî yê Rejîmê Îranî (IRGC) de yo.
Gumanê derheqê merasimê definkerdişî de
Taloqkerdişê merasimê fermî yê definkerdişê Elî Xameneyî zî persanê neweyan vejeno vernî. Her çend Tehran vano ke merasîm seba qerebalixîye ameyo taloqkerdene zî, goreyê edetanê Şîayan ganî merde zaf lez bêro definkerdene. Belge de yeno vatene ke Qûm de seba Xameney û keyeyê ey amadekarîya mezelêka girane (turbe) yena kerdene.
Qûm: Merkezê îqtîdarî yo newe
Şaristanê Qûmî prosesê dîyarkerdişê cagirê Xameneyî de bîyo merkezêko krîtîk. Destpêkê adarî de, demo ke Meclîsê Pisporan seba weçînayîşê lîderî ameybî pêser, awanîya înan Qûm de hetê Îsraîlî ra ameybî rijnayene. No mojneno ke şerê îqtîdarî û şerê leşkerî eynê merkez de yenê pêser.
