Endamê Meclîsê PJAK’î Rîvar Abdananî îdiayê sey înan Amerîka ra çekî girewtê red kerdî û vat ê nêwazenê Kurdîstan bibo warê şerî.
Endamê Meclîsê Partîya Cuya Azade ya Kurdîstanî (PJAK) Rîvar Abdananî ke Servîsê Farskî yê BBC’yî rê qisey kerd, îdiayê sey înan Amerîka ra çekî girewtê red kerdî û nêzdîbîyayîşê rêxistine yê prosesî erjna.
Abdananî îfade kerd ke PJAK çarçeweya rêxistinî û xopawitişê meşrû de vera Komara Îslamî ya Îranî têkoşîn keno û vat: “Ma nêwazenê Kurdîstan bibo warêkê şerî. Programêkê PJAK’î yo pêroyî est o ke semedê heme Îranî yo.”
Abdananî derheqê têkîlîya welatanê teberî de qisey kerd û vat: “Qet dezgehêkê îstîxbaratî reyde têkîlîya ma çin a. Ma cehd kenê ke kesê ke wazenê rejîmê Îranî bibedilnê înan reyde dîyalog ronê. Waştişê ma yo esasî pawitişê komelî yo.”
Abdananî derheqê îdiayanê sey hêzanê kurdan Amerîka ra çekî girewtî de zî nê vatî: “Ma Amerîka ne hetkarî, ne çek ne zî ekîpmanê leşkerî girewtê. Çarçeweya projeyê xo de hazirîya hêzanê ma est a. Gerîlayê PJAK’î semedê pawitişê şar, nasname û herra xo tecrubeyanê seserre ra îstîfade kenê. Reyna ma çekê ke ma bi xo viraştî, înan ra îstîfade kenê.”
Abdananî bale ante Yewîya Hêzanê Sîyasî yê Rojhelatê Kurdîstanî ser o û vat ganî yewîya partîyanê kurdan bibo vengê Kurdîstanî û vera tehdîtan hêzêko leşkerî yo hempar bêro pêardene.
Abdananî îfade kerd ke hêzê înan Başûrê Kurdîstanî de tehdîtêk nîyê û vat têkoşînê înan ê vera DAÎŞ’î ney mojneno. Abdananî vat “Kurdîstan de ça de hêriş bêro kerdene kurdî şinê uca şarî pawenê.”
