TJA derheqê rayîrşîyayîşê xo de ke do 19ê nîsane de Gemlîk de seba azadîya fîzîkî ya Rayberê Şarê Kurdî Abdullah Ocalanî bêra ca eşkerayî daye û wina ame vatene: “Ma do seba azadîya fîzîkî ya Rayber Apoyî roja 19ê nîsane Gemlîk de bibê. Bêrê ma Gemlîk de bêrê têhet.”
Têgêrayîşê Cinîyanê Azadan (TJA) derheqê rayîrşîyayîşê xo yê 19ê nîsane de ke qezaya Gemlîk a Bursa de seba azadîya fîzîkî ya Rayberê Şarê Kurdî Abdullah Ocalanî organîze bikero, awanîya Beyoglu ya HDK’yî de eşkerayî daye. Tîya de pankartê “Nika demê azadîya Rayber Apoyî yo, nika demê cinîyan o” ame akerdene. Aktîvîstê TJA’yî, temsîlkarê DEM Partî û DBP’yî, sazgehê cinîyan û xeylê cinî beşdarê eşkerayî bîyê. Eşkerayî hetê aktîvîsta TJA Ayşe Aksoy ra ameye wendene.
‘Azadîya Rêberîye do raya haştî û demokratîkî zî akera’
Ayşe Akso îfade kerd ke ewro vera modernîteya kapîtalîst bi felsefeyê “Jin, Jiyan, Azadî” têkoşînê cinîyan her ca de vila bîyo û wina vat: “Rojhelatê Miyanênî de şer dewam keno, şarî bênasname yenê verdayene. Vera ney ma cinî rayîrê çareserî, paradîgmaya modernîteya demokratîke de vînenê. No zî ancax bi komelkîbîyayîşî reyde mumkin o. Pratîkbîyayîşê prosesê ‘Aştî û Komelê Demokratîkî’ ancax bi azadbîyayîşê Rayberê Şarê Kurdî Abdullah Ocalanî mumkin o. Ma cinîyî bawer kenê ke bi caameyîşê azadîya Rayberîye, rayîrê aştî û demokrasî zî do bêro akerdene. Fabrîkayanê Marmara ra heta erdê Mezopotamya, heme komelî aştî wazenê. Rayîrê aştîye Îmrali de, azadîya Birêz Abdullah Ocalanî ra vêreno. Azadîya fîzîkî ya Rayberê Şarê Kurdî Abdullah Ocalanî seba ma waştiş nîyo, seba awankerdişê cuyêka demokratîk, ekolojîk û azadîya cinîyan mecbûrîyetêk o.”
‘Dem demê azadîya Rayber Apoyî yo’
Ayşe Aksoy dîyar kerd ke sey TJA rayîrşîyayîşê azadîye ku 4ê nîsane de dest pêkerdo silam kenê û qiseykerdişê xo wina qedêna: “Ma do bi sloganê ‘Dem demê azadîya cinîyan û azadîya Rayber Apoyî yo’ 19ê nîsane de qezaya Gemlîkî ya Bursa de bibê. Demê cinîyan, demê ameyîşê hetê Rayberîye yo. Çareserkerdişê meseleyê kurdî bi rijnayîşê dêsanê Îmrali do bibo. Ma cinîyê ke herêma Marmara de ciwîyenê; embazan, sosyalîstan, femînîstan, Dayîkanê Aştî û têgêrayîşanê cinîyan seba aştî dawetê têkoşînî kenê. Seba ke ma wayîrê îradeyê xo bivejîyê û seba azadîya fîzîkî ya Birêz Abdullah Ocalanî bîqirê, ma do 19ê nîsane de saete 13:00î de Gemlîk de bêrê têhet. Do azadîye û cinîyî serkewê. Jin, Jiyan, Azadî.”
Dimayê wendişê metnî, eşkerayî qedîyaye.
