KJAR’î bale ant rewşa girewteyanê cinîyan ê sîyasîyan ê Îranî ser o û vat semedê vindarnayîşê dardekerdişan ganî komelê mîyanneteweyî cade têbigêro.
Komela Cinîyanê Azadan a Rojhelatê Kurdîstanî (KJAR) derheqê cezayanê îdamî ke Îran de çend şino zêdîyene, eşkerayî daye û vat bi îdaman wazenê waştişê azadîye vindarnê. KJAR’î bi taybetî bale ant rewşa girewteyanê cinîyan ê sîyasîyan ser o û vat semedê vindarnayîşê dardekerdişan ganî komelê mîyanneteweyî cade têbigêro.
Eşekerayî de nê ameyî vatene: “Îran de dardekerdişî bîyî sey parçeyêkê tedaya sîyasî. Bi dardekerdişan yeno waştene ke şar biterso û waştişê azadîye bêro bêvengkerdene. Rixmê dardekerdişan têkoşînê azadîye nîno vindarnayene û eksê ci de têkoşîno komelkî xurtêr beno. Bi taybetî girewteyê cinîyî yê sîyasîyî binê teda û îşkence de yê. Cinîyê ke Îran de vera teda vernîya têkoşînî de ca genê, bîyî sembolê xoverdayîşî.
Goreyê doneyanê peyênan ke rixmê şertanê şerî û birnayîşê înternetî de ameyî destfînayene, rojanê peyênan de 30 kesî ameyî dardekerdene. Xora îfadeyê nê kesan binê îşkenceyî de ameyê girewtene û heqê merdiman ê bingeyînan ra mehrum ameyî verdayene. Seba ke nika çimê pêrune serê şerê herême de yo Îran de dardekerdişî zêdîyene û binpayakerdişê heqan yenê nimitene. Ganî dezgehê heqanê merdiman, rêxistinê komelê sîvîlî û rayrapêroyî ya mîyannetweyî cade semedê vindarnayîşê dardekerdişan têbigêro.”
