Amed de bi ameyişê wisarî kenger, gulik, xerdel û pine dezgehan ser o cayê xo girewt.
Qezaya Sûrî ya Amedî de bi ameyîşê wisarî xeylê kuçe û cehdeyan de dezgehan ser o vaş-mehsulê wisarî yenê rotene. Taybetî bazar û serê rayîran de, rotoxan dest bi rotişê tewir tewir vaş û pincaran kerd ke mewsîmê wisarî de zergûn benê. Nê pincarê ke kulturê herême de cayêko muhîm gênê, her serre nê wextî de hetê şarî ra yenê waştene. Rotoxî vaşanê sey kenger, pine, xerdel, gulik û çîyanê bînan anê dezgeyan ser û şar înan ra gêno. Xeylê kesî nê tewir pincaran tena seba werdişî ney, sewbîna zî seba feydeyanê înan ê weşîye zî tercîh kenê.
Rotoxan da zanayene ke her serre bi ameyîşê wisarî nê tewir pincarî Koyê Qerejdax, Koyê Çewlig û Bedlis de kom kenê û anê dezgehanê xo ser roşenê. Rotoxan semedê vayîya mesrefan gerre kenê û wina vat: “Vaşê wisarî zaf yenê waştene, taybetî zî hetê kesanê ke werdanê adetî yê herêmî ra hes kenê. Sewbîna zî seba ke şertê ekonomî rotişî ser o tesîr kenê, xeylê kesî tena pers kenê û semedê vayîye nêgênê, derbas benê. La her çend nê tewir vaşê ke ma anê vay bibê zî reyna şar gêno.”
Rotoxan dîyar kerd ke vaşê xozayî di aşman de zergûn benê û dewam kenê û seba ke zehmetîya înan û vaşê pakkerde nêyî, înan rê yenê, eşteyî zêde benê û malîyetê înan giran beno.
