Qezaya Bismilî ya Amedî de, bi pêşengîya MEBYA-DER’î seba cangorîyanê aşma gulane programê vîr ardene ame viraştene.
Programê MEBYA-DER’î seba vîr ardena cangorîyanê aşma gulane dewam kenê. Bi pêşêngîya MEBYA-DER’î qezaya Bismilî ya Amedî de cangorîyê dewaya azadîya Kurdîstanî ameyê vîr ardene. Program bînaya rêxistina DEM Partî ya Bismilî de ame viraştene. Program de Hemserekê DEM Partî û DBP’î yê Bismilî, endamê partî, Dayîkê Aştî û xeylê welatijî amade bîyê.
Vîrardiş bi deqîqeyêk rêzgirewtişê seba cangorîyanê têkoşînê azadî dest pêkerd û dima ra sînevîzyon ke serê cuye û têkoşînê cangorîyan amebî amadekerdene, ame mojnayene.
‘Ma do wayîr têkoşînê înan vejîyê’
Vîrardiş de Hemserekê MEBYA-DER’î yê Amedî Ramazan Dengîzî qisey kerd û bale ante serê prosesê Aştî û Komelê Demokratîk û ard ziwan ke aşma gulane tarîxê têkoşînê de wayîrê cayêko muhîm o.
Ramazan Dengîzî seba wayîrvejîyayîşê mîrasê cangorîyan vengdayîş kerd û wina vat: “Hemrayê ma yê ke aşma gulane de cuya xo ra bîyê, seba rûmet û azadî canê xo feda kerdo. Ma do sey şopdarê înan, heta peynî wayîr ro têkoşînê û vîrardişê înan vejîyê û amancê înan bi ca bîyarê.”
