Welatij Atîlla Yenîsoy zî tewrê rayraşîyayîşê, “Gamêk seba Aştî” bi û vat: “Heta ke Serek Apo azad nêbo aştî nêyena. Seba naye dewlete gerê leze gaman bierzo.”
Partîya Têduştî û Demokrasî ya Şaran (DEM Partî), seba waştenanê xo yê çarçewaya Prosesê Aştî û Civaka Demokratîk de, bi sloganê “Gamêk seba aştî” rayraşîyayîşêk viraşt. Rayraşîyayîş qezaya Rezanî yê Amedî de verê Hepisxaneyî ra dest pêkerd. Rayîrşîyayiş de seba azadîya Rayberê Şarê Kurd Abdullah Ocalanî sloganî ameyî eştene û pankart û resmî ameyî berzkerdene. Rayîrşîyayiş de qicanê 7 serreyan ra bigêrê heta kalanê 70î serreyan, bi hezeran kesan seba aştî û demokrasî pîya vengê xo berz kerd.
Nê welatijan ra yew zî Atîlla Yenîsoy o. Astengdar Atîlla Yenîsoy bi sandalîya xo ya tekerine qezaya Bismilî ra seba rayraşîyayîşî ameybî. Atîlla Yenîsoy sereyê rayraşîyayîşî ra heta peynîya ci vernîya girseyî de şî. Atîlla Yenîsoy mîkrofonê ma rê qisey kerd.
‘Heta Serek Apo azad nêbo, aştî nêna’
Atîlla Yenîsoy bale ante aştîya mabênê şarê kurdî û tirkî ser û vat: “Heta ke Rayber Apo vera nêdîyo, ma na aştîye qebul nêkenî. Labelê heta ke serek Apo azad nêbo, ma na aştîye qebul nêkenê. Bê azadîya serekî, aştî şaşitî ya. Vengdayîşê mi seba şarê ma yê kurdî yo; wa wayîrê Rêber Apoyî bivejîyo. Yew rêberêko sey Rêber Apo nêameyo dinya. Coka ra zî wa şarê kurdî pêro pîya wayîrê serekê xo û nê prosesî bivejîyo.”
‘Gerek dewlete leze gaman bierzo’
Atîlla Yenîsoyî seba game nêeştîşê dewleta tirke zî reaksîyon nîşan da, veng da û wina vat: “No proses Serek Apoyî da destpêkerdene. Eke dewlete oncîna kurdan bixapêno, no seba tirkan zî seba kurdan zî rind nêbeno. No semed ra gerê dewlete leze gaman bierzo.”
