Rojnameger Îkram Balekanî vera sansurkerdişê fotoyê Rayberê Şarê Kurdî Abdullah Ocalan vengdayîşê sazî û partîyanê sîyasî yê Kurdîstanî û dinya kerd ke bikewê mîyanê têgêrayîş.
Rojanê peyênan de hinî sazgehê medyayê Başûrê Kurdîstanî û Tirkîya de weşan kenê, fotoyê Rayberê Şarê Kurdî Abdullah Ocalan sansur kerdbî. Sewbîna zî platformê medya dîjîtal ê girêdayê Meta wek, Facebook, Instagram û Tîktok fotoyê Abdullah Ocalan sansur kenê.
‘Helwêstê Ava Medya nîno qebûlkerdene’
Rojnameger Îkram Balekanî dîmenêk bi nameyê “Vengdayîşê seba raya pêroyî” pare kerd û helwêstê Ava Medya ya ke fotoyê Rayberê Şarê Kurdî sansur kerdbî rexne kerd. Balekanî dîyar kerd ke o helwêstê Ava Medya rast nîyo û vat: “Ganî vera sansurî vejîyê la paştî danê sansur, no helwêst zî beno otosansur, no helwêst nêno qebûlkerdene.”
‘Ganî sazgeh û partîyê sîyasî vera sansurî bikewê têgêrayîş’
Îkram Balekanî veng da partîyanê sîyasî yê çar hetanê Kurdîstanî, sazgehê huqûqî û yê heqê merdiman, sendîkayê mîyanneteweyî kerd û wina vat: “Sendîkayê tewr girdî yê dinya, sendîkayê karkeran yê Îngilîstanî ke seba azadîya Nelson Mandela zî xebate kerde bî, nika seba azadîya birêz Abdullah Ocalanî xebitîyenê, ganî vera nê sansurê platformanê medyaya dijîtal vengê xo berz bikerê û na bêhuqûqî qebûl mekerê. Birêz Ocalan eşkerayî dano, pêvînayîşan keno, çapemenî wazena înan bikero xebere la tersenê. No binpaykerdişê heqê komunîkasyonî yo. Ganî nê sazgehê ke mi behsê înan kerd, platformanê dîjîtal reyde bikewê têkilî û înan hişyar bikerê ke statuya birêz Ocalanî, statuya sermuzekkereyê yo.”
