Kordînasyonê KJK’yî vat: “Ma venga heme kesan danê ke vera hêrişanê dewlete, îqtîdar û pederşahî yê vera şarê ma û cinîyan, bi ruhê seferberîye beşdarê têkoşînê zîhnîyetê komelkî, pawitiş û xoverdayîşî bibê.”
Kordînasyonê KJK’yî vat ke seba têkoşînê estbîyayîş û statuyê şarê kurdî û cinîyan bi sîyasetanê bêçareserîye, xirabkerdiş û hewanayîşî cewab dîyeno. Nê bingeyî ser o Xezale Mewlan ke encamê hêrişanê leşkerîyan ê rejîmê Îranî şehîd bîye, yad kerd û serweşîye waşt keyeyê aye, rêxistina Komala û şarê kurdî rê. Kordînasyonê KJK’yî hêrişanê rejîmê Îranî ke vera rêxistina ke têkoşînê estbîyayîşê şarê kurdî kenê, kerdî şermezar kerd û venga rejîmê Îranî da ke hêzê îtîfaqî yê îradeyê sîyasî yê şarê kurdî reyde dîyalog û muzakere bikero.
KJK’yî dîyar kerd ke averşîyayîşanê peyênan ê dewaya Gulîstane Doku newe ra mojna ke sîstemê şerê taybetî Kurdîstan de bi torranê walîyan, polîsan û hemkaranê cayîyan yenê caardene. KJK’yî wîna domna: “Gulîstan Doku bi koordînasyonê walîyî bi hewayêko wehşî ameye kiştene û nimitene û şerê taybet ke cinîyanê kurdan bi remnayîş kiştiş hedef gêno, qebul nêkeno. Zaf dewayê ke mîyan de faîlî rayedar ê, bi sîyasetêko taybet yenê tarîkerdene.
Ma venga heme şar û rêxistinanê cinîyan danê ke nê dewayî bêrê taqîbkerdene û berpirsîyarî bêrê cezakerdene. Problem tena sey dewayanê cayî û şexsî ganî nêro erjnayene, ganî seba eşkerakerdiş û hewanayîşê awanîyanê şerê taybetî têkoşîn bêro kerdene. Bi taybetî ma venga ciwan û cinîyan danê û ma vanê tu hêz, awanî û endaman reyde ke şorişgir û demokratîk nîyê û têkilîyê welatperwerî ra dûrî yê, têkilî meronê. No, xoverdayîşo tewr xurt o.”
