TAJÊ bi munasebetê serrgêra qetilkerdişê 19 cinîyanê Êzîdîyan ya 10. eşkerayî daye û vat: “Heta berpirsîyarên fermanî ra hesab bêro persayene, ma do têkoşînê xo bidomnê.”
Têgêrayîşê Azadîya Cinîyanê Êzîdîyan (TAJÊ), bi munasebetê serrgêra qetilkerdişê 19 cinîyanê Êzîdîyan ya 10. vernîya Meclîsê Şarî yê Şengalî de eşkerayîyêk daye. Nê 19 cinîyî, 3ê hezîrana 2016î de seba ke bedilnayîşê dînê xo red kerd, dimayê îşkenceyêko giran, qadêka Mûsilî de zereyê qefesêk de ameybî veşnayene û qetilkerdene.
Eşkerayî hetê Verfeka TAJÊ Rîham Hesen ra ameye wendiş. Rîham Hesen ard vîr ke fermanê 3ê tebaxe de zaf cinîyê Êzîdîyan ameyî remnayene û 19 cinîyî 3ê hazîrana 2016î de vernîya çimanê her kesî de, zereyê qefesêk de ameyî veşnayene.
Rîham Hesen ke nê 19 cinîyê Êzîdî yad kerdê, bale ant dewamkerdişê têkoşînê cinîyan ser o û nê çîyî vatî: “Sey TAJÊ ma nê cinîyan reyna yad kenê û sozê xo ya têkoşînî newe kenî. Ê nêyenê xovîrrakerdene û ma do înan nêdî xovîrrakerdene zî. Çîyo ke serê komelê ma de ameyo kerdene, nimûneyê ci çîn o. Bi munasebetê na roje ma veng danê sazgehanê cinîyan ke seba caardişê edaletî vengê xo berz bikerê.”
Rîham Hesen da zanayene ke do her tim qîrayîşê nê cinîyan goşanê înan de bibo û ê do têkoşînê xo hîna berz bikerê. Rîham Hesene wina vat: “Seba ke berpirsîyaranê nê fermanî ke destanê înan de gonîya komelê ma est a hesab bêro waştene û edalet cayê xo bivîno, ma do her tim têkoşînê xo bidomnê.”
Eşkerayî bi sloganê ‘Jin, Jîyan, Azadî’ qedîyaye.
