Pîran de panalê ziwanê kirmanckî virazîya. Panelê de panalîstan bal ant vîndîbîyayîşê kirmanckî ser o.
Qezaya Pîran a Şaristanê Amedî de panelê ziwanê kirmanckî virazîya. Panel bi pêşengîya şaredarîya Pîranî de şaredarî de ame viraştiş. Panel de nuştox Hacî Ozkal moderatorîye kerd, nuştox Gurcî Esen, Turabî Kîşîn û Ahmet Tekdemîr zî sey panelîst ziwanê kirmanckî ser o qisey kerd.
Ewil Hemşaredarê Şaredarîya Pîranî Haci Akengîn û Aysel Baran silam da mêmanan û panelîstan. Dima ra zî xebatanê şaredarî û ziwanê ser o qisey kerd. Qiseykerdişanê înan ra pey panalîstan dest bi qiseykerdişê xo kerd.
Moderator Hacî Ozkal bal ant ziwanê kirmanckî ser o û dima ra panelîstî dayê şinasnayene.
Tîya de nuştox Gurcî Esen behsê hîkayeya kitabê xo kerd û vat: “Ziwanê ma zazakî nêyeno qiseykerdiş û ver bi vindîbîyayîşî şono. Gedeyê ma ziwanê xo qisey nêkenê. Her dayîk keyeyê xo de mamoste ya. Cinîyê ma zaf jêhat ê, gerek gedeyanê xo de bi ziwanê xo qisey bikerî. Ma şêrê kamca ganî ma bi ziwanê xo qisey bikerê.”
‘Lehçeya kirdkî maya ziwananê Kurdkî ya’
Ahmet Tekdemîr zî vat: “Lajê Şêx Seîdî kurdî Şêx Selhedînî 1977de mirîdanê xo rê heqanê dînê îslamî ser o vateyê xo bi kirdkî nuştî, kirdkî zî dayêne. Ziwannasê kurdî vanî kirdkî maya ziwanê Kurdkî ya. Ez zî vano kirdkî, eynî ziwanê kurdî tira awe werda.” Ahmet Tekdemîrî dima ra şîîrê xo wendê.
Nuştox Turabî Kîşînî zî vat: “Goreyê tayê zanistan heta 1939-40-45 serran ziwanê ma mîyanê şarê ma de hema hema se ra 99-100 yeno qiseykerdiş. Nika no kewto se ra 10-15. No zî zafêrê hetê ê kesan ra yeno qiseykerdiş ke emrê xo 40 ra corêr ê. No ber eke mîyan ra vejîyo ziwan zî terba înan şono. Aye ra UNESCO vano eke tedbîrî nêrê girewtene, emrê nê ziwanî 30 serrî ra pey qedîyeno. Vatîş hewce nêkeno hal vera çiman o.”
Panel pers û cewaban ra pey qedîya.
