Taxa Akkopru ya qezaya Rêya Armûşî ya Wanî de telîmatê qeyûmî ser o, sînorê Parka Koşuyolu ame tengkerdene. Her çend darî nêameybî hewanayene û makîneyê karî nika qadî ra xo ancenê zî kêmkerdişê qadê keskayî yê seba hîrakerdişê rayîrî beno sebebê nerazîbîyayîşan.
Mîyanê qerebalixîya şaristan û blokanê betonî de qadê keskayî tena xeml nîyê, ê cayê boyegirewtişî û heqê cuye yê her welatîyêk ê. Ewro eke şaristanê ma roje bi roje bi betonî yenê dorpêçkerdene, pawitişê her darî û awankerdişê her parke beno têkoşînêk seba komelî. Eynê wextî de qadê keskayî seba gedeyan cayê kayî, seba pîr û kalan cayê aramîye û seba xoza zî sitargeh ê. O semed ra pawitişê qadanê keskayî tena wezîfeyê şaredarîyan nîyo, eynê wextî de berpirsîyarîyêka merdimî û ekolojîk o.
Sînorê keskayî apey yenê antene
Xebatan de ke sey “sererastkerdişê rayîrî” ameyê destpêkerdene, sînorê Parka Koşuyolu ameyê bedilnayene. Parka taxe de seba viraştişê rayîrê asfaltî qadê kesk ame kêmkerdene. Her çend darê parkî hema zî cayê xo de bibê zî, tengkerdişê parke mojneno ke polîtîkayê qeyûmî herinda ke qadanê komelkî bipawo, qadanê betonî hîra keno.
Makîneyî şîyê, xeripnayîş mend!
Makîneyê karî nika uca de nîyê la tesîrê xebatanê parke ser o dîyar ê. Nêzdîyê hîrê çar aşmî xeylê cayanê park û rayîranê derûdorê aye de xeripnayîş û çalê xorînî hema zî paweyê viraştişî yê. Welatîyê herême her çend rîyê fikaranê sîyasî ra nêwazenê bi fermî eşkerayî bidê zî vera ney razî nîyê.
