Rayberê Şarê Kurd Abdullah Ocalanî Konferansê Yewîya Kurdanê Vakurî rê mesajêk erşawit û wina vat: Meseleyanê tewr bingeyînan ê şarê kurdî ra yewe meseleya yewîye ya. Nê semedî ra Yewîya demokratîke mecbûrîyetêka tarîxî ya.
Rayberê Şarê Kurd Abdullah Ocalanî konferansê “Kurdên Bakur Yekîtiya xwe ya Neteweyî nîqaş dikin” rê ya ke hetê Înîsîyatîfê Yewîya Demokratîke ra ameye organîzekerdene, mesaj şawit. Mesajê Rayber Ocalanî wina yo:
“Tewrbîyayoxê erjîyayeyî,
Komelêk semedê domnayîşê estbîyayîşê xo, gerek xo goreyê raştîyanê dewrî bibedilno. Qet awanîyêka komelkî ya ke nêeşkena xo bibedilno, dînamîkanê zereyê xo zemînêkê demokratîkî de newe ra rono, nêeşkena bibo mende.
Kurdî zî rîyê înkar, îmha û polîtîkayê zextî ke xeylê serî raştê ci ameyî, îmkanê caardişê bedilnayîşê xozayî ra mehrum ameyî verdayene.
Ewro meseleya bingeyî ya ke verê ma de vindena, meseleya komelê kurdan senî eşkeno bêro halê komelêkê demokratîk û modernî.
Kurdî; bi tarîx, ziwan, kultur û komelkîya xo raştîyêk ê. Semedê domnayîşê na raştîye; ganî waranê sîyaset, ekonomî, perwerde, weşîye û kulturî de îradeyê xo bieşkê vejê meydan. No têna bi dezgehbîyayîşêkê xurtî yê sîyasî û komelkî mumkun o.
Semedê komelê demokratîkî prosesê înşayeyêkî yo bi zanistî hewce keno. No înşa ne bi şîdetî, ne ferzkerdişî beno. Bi rêxistinîya komelkî ya ke bi sîyasetê demokratîkî û zemînê huqûqî de yena rayraberdene mumkun o. Bingeyê nê prosesî zî o yo ke komelbîyayîş, ekonomî, kultur, ziwan û tarîxî goreyê esasanê demokratîkan newe ra bêrê destgirewtene. Demokrasî cayo ke tede zext û zorî çîn ê awan benê.
Nê semedî ra komelê kurdan têna vera teberî ney, ganî têkîlîya mîyanê xo de zî goreyê prensîbanê demokratîkan xo newekerdişî esas bigêro. Ma senî ke têkîlîyanê bi dewletanê-netewe dir çareserîya demokratîk û muzakereyî wazenê, ganî ma mîyanê xo de zî şîdet ney, sîyasetê demokratîkî û huqûqî esas bigêrê. Rayîrê yewîya demokratîkî, muzakereyê demokratîkî ra vîyareno ra.
Meseleyanê tewr bingeyînan ê şarê kurdî ra yewe meseleya yewîye ya. Nê semedî ra Yewîya demokratîke mecbûrîyetêka tarîxî ya. Kombîyayîşê kongreyêka hîra û yewîya demokratîke semedê wertevertişê aqilê hemparî û îradeyê hemparî wezîfeyo lezabez o. Kurdî gama ke welatanê ke tede ciwîyenê gêrenê rayîrê muzakereyê demokratîkî, mecburê ke problemanê mîyanê xo zî bi eynî metodan çareser bikerê.
La sîstemê eşîretî, qabîletî û tekîlîyê tengî yê ke komelî parçe kenê, verê nê prosesî de sey astengêkê muhîmî vindenê. Nê zîhnîyet, awanîya komelkî zehîf kerda û texrîbatê giranî afirnayî. Heta ke na raştîye de nêro têrî înşayê yewîya demokratîkî mumkun nîyo.
Ronayîşê atmosferêkê komelkî ke pêkewtişê zereyî xo dima verdayî û vera yewbînan hurmet yeno kerdene mumkun o. Rayîrê nê zî o yo ke esasê demokratîkî heme waranê cuya de bêrê caardene. Wezîfeyê ma yê dewrê verê ma yo tewr muhîm o yo ke sere de awanîyê sîyasî, no fam game bi game komelî rê bêro vilakerdene,
Dewrê verê ma, hetê komelê kurdan ra dewrêkê newe ra ronayîşî yo.
Bingeyê nê ronayîşî zî yewîya demokratîk, sîyaseto demokratîk û muzakereyo demokratîk o. Her gama ke na çarçewe de do bêro eştene, ameyoxê ma yê hamparî do bewlî bikero.
Ez şima pêrune bi heskerdiş û hurmetî yê bêpeynî selam kena.
Abdullah Ocalan
İmrali.”
