Rojnameger Dilovan Asmîna ke Tişrînî de netîceya hêrişê dewleta tirke de birîndar bîyî, vat: “Ê bi hedefgirewtişê rojnamegeran nêeşkenê roşnîya heqîqetî hewna bikerê. Ma do vengê xoverdayîşî berz bikerê.”
Hêrişê giran ê dewleta tirke yê ke 8ê kanûna 2024î de verba Awbendê Tişrînî dest pêkerdî raştê xoverdayîşê şervanan û şarê herême ameyî. Rojnameger Dilovan Asmîna ke şahîdî nê xoverdayîşî bîye 21ê çeleyê 2025î de birîndar bîye.
Dilovan Asmîn ajansê ANF’yî rê qisey kerd û bale ant muhîmîya Awbendê Tişrînî ser o û nê vatî: “Verba Tişrînî û dormeyê ci hêrişê giranî benê û verba nê hêrişan xoverdayîşo tarîxî yeno dayene. Şervanê YPJ û HSD’yî şertanê tewr zoran de zî bi îradeyêko xurt cewab danê nê hêrişan. Şervanî tena semedê keyeyanê xo nê semedê heme şarê herême xover danê. Awbend hewcedarîya awe û enerjî yê bi mîlyonan merdiman ano ca. Coka no xoverdayîş, xoverdayîşê estbîyayîşî yo. Awbendê Tişrînî semedê nasname û ameyoxê şarî sembolêko krîtîk o.”
Rojnameger Dilovan Asmîn wina dewam kerd: “8ê çeleyî ra nat şaro ke bi konvoyan resa awbendî rixmê hêrişan bi hewayêkê qerardarî nobete tepişeno. Şarî bi waştişê pawitişê awe, enerjî û herra xo Awbendê Tişrînî de nobete tepişenê. Şarê ke resayî awbendî merkezê şerê estbîyayîş û çînbîyayîşî de ca genê. Şaro ke nobete tepişeno hewa û erdî ra raştê hêrişan yeno. Nê merdimê ke rixmê qirkerdişanê ke ameyê kerdene xoverdayîşê xo domnenê, semedê ameyoxê şaran bi hewayêkê qerardarî xover danê.’”
Dilovan Asmîn ard ziwan ke xoverdayîşê Awbendê Tişrînî de rojnamegerî zî zehmetîye ancenê û nê vatî: “Rojnamegerê ke warê şerê giranî de xebiteyenê xora şehadet zî genê çim. Ê bi hedefgirewtişê rojnamegeran nêeşkenê roşnîya heqîqetî hewna bikerê. Cîhan û Nazim wexto ke peyê heqîqetî de bîyê şehîd bîyî la qelem û kamerayê înan erdî de nêmendî. Xoverdayîşê Tişrînî heqîqetî dano eşnawitene. Qirkerdişê ke tîya de benê ma bi kamerayanê xo dinya rê danê eşnawitene la hema zî komelê mîyanneteweyî vera nê sûcanê şerî bêveng ê.”
