Stenbol de karkeranê ke waşt Taksîm de 1ê Gulane pîroz bikerê rastê hêrişê polîsan ameyê û xeylê kesî bi pirodayîş ameyê destbendkerdene.
Sogutluçeşmeya Kadikoy de bi hezaran karker, kedkar û welatijan govende girewte hêvîyê rayîrşîyayîşî yê.
Xeylê merkezanê Kurdîstan, Tirkîya û Dinya de pîrozkerdişê 1ê Gulane Roja Yewîye, Paştîdayene û Têkoşînê Karkeran yeno pîrozkerdene.
Polîsan Mecîdîyekoy de hêrişê girseye kerd
Stenbol de qezaya Kadikoy û semtê Taksîmî de karkerî seba rayîrşîyayîş û çalakîyan virazê kom bîyê. Partîyê sîyasî û rêxistinê kede û ciwanan seba 1ê Gulane Taksîm de pîroz bikerê Mecîdîyekoy de ameyê têhet û waşt ke ver bi meydanê Taksîmî rayîrşîyayîş virazê. Naye ser polîsan hêrişê girseye kerd û xeylê kesî bi pirodayîş destbendkerdî.
Hûmara kesê ke ameyê destbendkerdene nêame zanayene.
Sogutluçeşme de coş û govende
Merkezê pîrozkerdişê 1ê Gulane ra yew tira zî dingê Sogutluçeşme yê Kadikoyî yo. Konfederasyonê Sendîkayanê Kedkaran yê Pêroyî (KESK), Konfedarasyonê Sendîkayanê Karkeranê Şorişger (DÎSK), Yewîya Tabîbanê Tirkan (TTB) û Yewîya Odeyanê Mîmar û Muhendîsan a Tirkan (TMMOB) û temsîlîyetê kede do 1ê Gulane Îskelaya Kadikoy de pîrozbikerê. Pîrozkerdiş do bi sloganê “Seba kede, edalet, aştî û demokrasî bibê yew û bivurnê” yeno viraştene.
Bi hezaran karker, kedkar û welatijî dingê Sogutluçeşme de kom bîyê û govende gênê û dest bi rayîrşîyayîş kenê.
