Fatmanur Çelîk û kêna aye Hîfa Îkra Şenguler, rîyê îstîmarê zayendî yê Ayhan Şengulerî ra, 2yê Adare de bi şeklêko şikdar dinyaya xo vurnabî. Dewa ra ver, rêxistinanê cinîyan vernîya edlîye de veng da û waşt ke faîl Ayhan Şenguler bêro cezakerdene.
Rayberê “Weqfê Xizmetê Quranî” Ayhan Şengulerî, Fatmanur Çelîk û kênaya aye Hîfa Îkra Şenguler îstîmar kerdbî. Badê cû, Fatmanur Çelîk û Hîfa Îkra Şenguler bi şeklêko şikdar 2yê Adare de dinyaya xo vurna. Rêxistinanê cinîyan, verê rûniştîşê qerarî yê dewayî de, verê Edlîyeya Anadoluyî ya Kartalî de eşkerayîyêk daye. Cinîyan pankarto ke ser o “Seba Fatmanur Çelîk û Hîfa Îkra Şenguler edalet” nuştebi, akerd. Beyza Bolukbaşî nameyê rêxistinanê cinîyan ser o eşkerayî wend.
‘Qeraro ke ewro bêro dayene, ganî bibo destpêkê edaletî’
Beyza Bolukbaşî dîyar kerd ke Fatmanur Çelîk û kênaya aye Hîfa Îkra Şenguler game bi game ver bi kişîyayîşî şîyî û wina qisey kerd: “Fatmanûr mergê xo ra ver vatbi ke ‘eke çîyêk bêro sereyê mi, mevajê întîhar o’. Na çekuye tena hişyarî nêbîye. Kesê ke ewro hesab bido tena faîl Ayhan Şenguler nîyo; dezgehê ke vernîya nê mergî nêgirewt zî berpirsîyar ê. Wezaret îhmalkar a, dewlete bêveng mende. Mergê Fatmanur Çelîk û Hîfa Îkra Şenguler de hema delîlî nêameybî arêkerdene, sey întîhar amebi eşkerakerdene. Labelê ma zanî ke xeylê hedîseyan de her çî ra ver vanê ‘întîhar o’, la bi têkoşînê cinîyan raştîye vejîyena orte. Ma do mergê Fatmanur û Hîfa Îkre de zî kiştox û faîlan ra hesab bipersî. Ganî bilez faîl Ayhan Şenguler bêro cezakerdene. Qeraro ke ewro bêro dayene, ganî bibo destpêkê edaletî.”
Eşkerayî bi sloganê “Seba Fatmanur Çelîk û Hîfa Îkra Şenguler edalet” qedîyaye.
