Enstîtuyê Kurdî yê Amedî “Ferhengê Kirmanckî” yo ke bi keda komîsyonêkê hîra amade kerdbi, weşana. Ferheng amanc keno ke perwerde û standartkerdişê lehçeya Kirmanckî de bibo çimeyêko bingeyîn.
Enstîtuyê Kurdî yê Amedî gamêka newa xebatanê Kurdkî de vêşî kerd û “Ferhengê Kirmanckî” weşana. No ferheng sey berhemê xebatêka kolektîf ke serra 2017î ra nika dewam kerdêne, vejîya vernî. Redakteyê ferhengî ke hetê Weşananê Enstîtuyê Kurdî yê Amedî ra ame çapkerdene, Komîsyonê Kirmanckî yê Enstîtuyî kerd.
Amadekarîya ferhengî de Ayşe Newroz, Azîz Şahîn, Denîz Maya, Ensarî Ozdogan, Fatma Gul Çîçek Ari, M. Selîm Ozak, Rukiye Dîcle, Salîha Ekîncî Karagoz, Selvî Ekîcî, Serhat Kiliç û Zehra Gultekîn ca girewto. Kapakê ferhengî hetê Newal Bulut û mîzanpajê ci zî hetê Zafer Tuzunî ra ameyo amadekerdene.
Bi amancê perwerdeyê bi ziwanê Kurdkî amade bîyaro
Vervateyê ferhengî de komîsyon dîyar keno ke na xebate tena açarnayîş nîya, bi amancê perwerdekarîya bi ziwanê Kurdkî amade bîya û wina vano: “Faydeyê ferhengî o yo ke, ferheng fehmkerdişê qiseykerdişanê herêmanê cîya-cîyayan seba yewbînan asan keno û berê ziwanêko standart akero.” Komîsyon dîyar keno ke înan xebatanê verênan ra feyde gîrewto; seba nê çîyî zî sipasîya Çeko Kocadax, D. Îzolî, Zana Farqînî û Grûba Xebate ya Vateyî kenê ke ferhenganê înan xebatanê înan rê rayîr mojnayo.
Sewbîna ferheng de vera çekuyanê kirmanckî, seba kurmancîya înan zî estunêk ameya aqitnayene, seba ke kurmancê ke wazenê ê zî bieşkê ci ra feyde bivînê.
‘Ziwanêko standart rê ber akeno’
Komîsyonê amadekar bal ant muhîmîya ferhengan ê prosesê standartkerdişê ziwanî ser o û wina vat: “Ferheng fehmkerdişê qiseykerdoxanê herêmanê cîyayan asan keno û ziwanêko standart rê ber akeno.”
Komîsyonî sewbîna sipasîya KURDÎ-DER, Enstîtuyê Amedî û Egîtîm-Senê Amedî kerd ke prosesê xebate de paştî daya înan û vat: “Hêvîya ma a ya ke, rojêke gedeyê kurdan bi ziwanê xo perwerde bivînê û no ferheng karê înan asan bikero. Ma no ferheng dîyarîyê domananê nê welatî kenê.”
Ferheng kîtabrotoxan de cayê xo girewt.
