Amed – Komela Edebîyatkaranê Kurdî ra Stran Yaşar derheqê 15ê Gulane de qisey kerd û vat: “Ma seba ke ziwanê xo vîndîbîyayîşî ra bixelesnê, ewilî ma gerek keyeyanê xo de qisey bikerî. Ziwan her çî ra ver gerek cuye de cayê xo bigîro. Sazgehê ziwanê Kurdkî zî ganî her şaristan û qeza de bibê.”
15ê Gulane Roja Ziwanê Kurdkî, ser ra 2006î ra heta ewro yeno pîrozkerdiş. 15ê Gulane pêşengîya Celadet Elî Bedîrxanî 1932î de weşanîyayîşê kovara Hawar ra pey, yeno pîrozkerdiş. Na roje seba kurdan pawitiş, xurtkerdişê ziwanî û seba ke ziwanê Kurdkî bibo ziwanê perwerdeyî waştişî yenê kerdene. Komela Edebîyatkaranê Kurdî ra Stran Yaşar derheqê 15ê Gulane de ajansê ma rê qisey kerd.
Stran Yaşar derheqê îlankerdişê 15ê Gulane wina vat: “Pêşengîya keyeyê Bedîrxanan de ame îlankerdiş. Taybetî Celadet Elî Bedîrxan û Kamûran, kovara Hawar vila kerd o peynîya kovar de kultur û ziwanê Kurdkî ser o vindert. Dimayê kovare, înan sey yew hereketê sîyasî pêşengê ma yê ziwanî bîyê. A kovare 15ê Gulane de ameye weşanayene. Tarîxê çapkerdişê kovara Hawar bi roşanê ziwanê Kurdkî. Bi serran o na çarçewa de yeno pîrozkerdiş.”
‘Ziwanê Kurdkî bireso heqanê xo yê qanûnî’
Stran Yaşar derheqê astengîyanê ziwanê ser o zî qisey kerd û vat: “Astengîyê ziwanê ser o nêyenê humaritiş, hende zaf ê. Bi serran o polîtîkayê asîmîlasyonî ziwanê Kurdkî ser o yenê şuxulnayîş. Hemverê nê polîtîkayan Kurdkî bi lehçeyanê xo yê kirmanckî zî kurmancî zî xoverdayo heta nê rojan zî ameyo. Ma hêvî kênê ke ewro ra pey bireso heqanê xo yê qanûnî. Bi hawayê fermî perwerde bêro dayîş û vîndbîyayîşî ra bixelesîyê.”
‘Programî zafane bi kirmanckî ameyê viraştiş’
Stran Yaşar derheqê pîrozkerdişê 15 Gulane de zî agahî dayê û vat: “Pîrozkerdiş heta 27ê Gulane şaristananê Kurdîstan û tay şaristananê Tirkîya de bêro pîrozkerdiş. Programê tewir tewirî do bêrî viraştiş. Seba balantişî zî xora şima zî zanê lehçeya kirmanckî ver bi vîndîbîyayîşî ya. Nê semedî ra programî zafane do bi kirmanckî bêrî viraştiş. Her kes xora berpirsîyar o, nê semedî ra gerek her kes ziwanê xo ser o têkoşîn bidê Serranê zaf verînan de kirmanckî keyeyan de zaf ameyêne qiseykerdiş. La dima ra ma kirmanckî ewilî keyeyanê xo ra vet dima ra cuya xo ra vet. Ma nika zî seba ke ziwanê xo vîndibîyayîşî ra bixelesnê ewilî ma gerek keyeyanê xo de qisey bikerî. Ziwan her çî ra ver gerek cuye de cayê xo bigîro. Sazgehê ziwanê Kurdkî zî ganî her şaristan û qeza de bibê.”
