Şaredarîya Amedî ya Şaristanê Girdî, Merkezê Weşîye ke tede xizmetê pawîtişê weşîye yenê dayene, reyna aktîf kerd û kerd xizmetê şarî.
Merkezê Weşîye bi hemkarîya Mudirîya Şûbeyê Xizmetê Weşîye yê Serekîya Daîreya Weşîye û Mudirîya Xizmetê Weşîye ya Şaredarîya Baglarî reyna aktîf bî û kewt xizmetê şarî. Merkezî de 29 personelî xebitîyenê ke 1 doktor û 12 personalê weşîye Şaredarîya Şaristanê Girdî ra, 2 doktorî û 14 personalê weşîye Şaredarîya Baglarî ra yê. Merkezê Weşîye de ke yew ambulans tede est o, do muayeneyî bêheq bêrê kerdene û şarê ke sîgortaya înan çin a do eczaxane ra destegê dermenan bigîrê.
Serekê Daîreya Weşîye Wahap Saçakliyî melumat da ke ê do seba pest, kanserê memikan û rahimî, tansîyon, şeker, mudaxeleyê lezabezî, weşîya şexsî, weşîya didanan, HIV û AIDSî perwerde bidê û ê do Taxa BenûSenî de dest bi xebatan bikerê. Wahab Saçakliyî va: “Merkezê ma de heme muayeneyî bêheq ê. Reyna, ma do şarê ke sîgortaya înan çin a, înan rê bi wasitaya eczaxaneya ke ma ronaya destekê dermanan bidê.”
