Bi rayberîya Şaredarîya Amedî ya Şaristanê Girdî, Têhetameyîşê Kede, Kultur û Hunerî yê Cinîyan yê 2. bi sloganê “Vînayîşê Keda cinî, paştîdayene û têkoşînê hempare” Meydanê Şêx Seîdî de dest pêkerd.
Têhetameyîşo ke hetê Serekîya Daîreya Xizmetê Cinîyan ê Şaredarîya Şaristanê Girdî ra ameyo organîzekerdene, bi beşdarîya hemşaredaranê qezayan, sazgehanê cinîyan, sendîka, kooperatîf û xeylê cinîyan Meydanê Şêx Seîdî de bi coşêko gird dest pêkerd. Hemşaredara Amedî û qezayanê ey, endam û rayberanê rêxistinanê cinîyan, sendîka, kooperatîf zî tede xeylê cinî beşdarê têhetameyîşî bîyî. Hemşaredara Amedî ya Şaristanê Girdî Serra Bucak destpêkerdişê çalakîye de qisey kerd û bale ante muhîmîya vînayîşê keda cinîyan û neqilkerdişê komelî ser.
‘Ma wazenê keda cinîyan bêro asene’
Hemşaredara Amedî ya Şaristanê Girdî Serra Bucak akerdişê programî de qisey kerd û bale ante muhîmîya asayîşê keda cinî. Serra Bucak îfade kerd ke cinî berardiş û hunerê xo têkoşînê cinî xurt keno û vat: “Cinîyan reyna fam kerd ke berardiş û paştîdayene çende bi manaya. Ma wazenê ver bi prosesêko wina şorê ke cinî heme warê cuye de ca bigîrê.”
‘Paştdayîşê cinîyan hêzê berardişî xurt keno’
Serra Bucak heme xebatkaranê kooperatîf û sazîyanê cinîyan rê spas kerd ke cinî bi paştdayîşî hêzê xo yê berardişî dî. Serra Bucak dîyar kerd ke Amed do bibo şaristanê cinîyan û wareyê ke cinî tede ca gênê do zafêr bêrê girdkerdene.
‘Têhetameyîş do 2 rojî dewam bikero’
Sereka Daîreyê Polîtîkayanê Cinîyan Ozden Gurbuz Sumer zî dîyar kerd ke no têhetameyîş warêko muhîm o ke cinî berhemanê xo yê serrêke pare kenê. Ozden Sumer îfade kerd ke hêzê cinîyan her warê cuye de vurîyayîşî xo reyde ano.
Badê qiseykerdişan, cinîyan govende çarna û standê ke ameyê akerdene ra gêrayê. Çarçewaya bernameyî de Atolyeyê Boyaxkerdişê camî û ravurîyayîşî zî ameyê organîzekerdene.
Programê têhetameyîşî bi konser û çalakîyanê hunerî do 2 rojî dewam bikero. Programê ewroyî do saete 19:00î de bi konsere gruba KASED JIN dewam bikero.
