Verfeka DEM Partî Ayşegul Dogan da zanayene ke ganî Rayberê Şarê Kurdî Abdullah Ocalan bieşko pêro beşanê komelî reyde dîyalog rono, her wina veng da Meclîsî ke seba averşîyayîşê prosesî, partîyanê sîyasîyan reyde mekanîzmayêka newa bêro awankerdene.
Verfeka DEM Partî Ayşegul Dogan, mabênê kombîyayîşê Heyetê Rayraberdîşê Merkezî (MYK) yê partîya xo de, merkezê pêroyî yê partî de kombîyayîşêkê çapemenî organîze kerd.
Ayşegul Dogan dîyar kerd ke înan kombîyayîşê MYK’yî de babetanê sey çalakîya “Seba aştî gamêk” averşîyayîşê prosesê Aştî û Komelê Demokratîk û hedîseyê ke Rojhelatê Mîyanênî de benê, munaqeşa kerdê û înan ser o qisey kerdo.
Ayşegul Dogan derheqê prosesê Aştî û Komelê Demokratîkî de dîyar kerd ke seba aştî înan xeylê şaristananê Vakurê Kurdîstan û Tirkîya de çalakîya “Seba aştî gamêk” viraşt û wina vat: “Bi mîlyonan kesan waştişê xo vatî. Waştişo hempar aştî ya. Waştişê komelî yê seba aştî teqez o, labelê bawerîya seba prosesî qels a. Komel wazeno aştî biba. Xebatê ma yê bi nê hawayî do dewam bikerê. Proses dewam keno labelê biney sistbîyayîşêk est o. Seba ke no sistbîyayîş bîvîyaro, lazimtîya ma bi cehdanê neweyan û xerîtayêka rayîrî est a. Serekê MHP’yî Devlet Bahçelîyî zî behsê xerîtayêka rayîrî keno. Sey DEM Partî ma zî wextêko derg o vanî proses merhaleyêka newe de yo û lazimtîya ci bi gamanê neweyan est a. Seba nê zî ma eşkerayîya biqîmet ya Devlet Bahçelîyî zî manadar vînenî.”
‘Ganî partîyanê sîyasîyan reyde mekanîzmayêka newe bêra awankerdene’
Ayşegul Dogan dewamê qiseykerdişê xo de bale ant eşkerayîya Serekkomarê Tirkîya ya derheqê prosesî de û wina dewam kerd: “Serekkomar vano proses dewam keno û Komîsyonê Meclîsî mojneno. Labelê wexto ke gavmê şênberî nêbê, mîyanê şarî de fikarê sey ‘gelo proses xetimîyayo’ vejîyenê vernî. Pêşnîyazê Devlet Bahçelîyî muhîm o, labelê ganî ma na mesela tena bi awankerdişê mekanîzmayêka koordînasyonî bisînor nêkerî. Endamê rêxistine ke wazenê têkoşînê çekdarî ra bîvîyarê têkoşînê sîyasî, do seba înan qanûnî bêrê nuştiş, no zaf muhîm o. Komîsyonê Meclîsî raporêko hempar zî amade kerd. Ganî seba caardişê nuqtayanê raporî, takvîmêk bêro dîyarkerdene û Meclîs berpirsîyarîya bigîro xo ser. Ma zî veng danê ke pêro partîyanê sîyasîyan reyde mekanîzmayêka newa bêra viraştene ke gamî bêrê eştene. Her ke gamî nêrê eştiş, bawerîya seba prosesî de do qelsbîyayîşêk bibo û vernîya provokasyonan aba.”
‘Ganî birêz Ocalan rasterast fîkranê xo komelî reyde pare bikero’
Ayşegul Dogan derheqê munaqeşayanê serê statuyê Rayberê Şarê Kurdî Abdullah Ocalanî de zî dîyar kerd ke Abdullah Ocalan sermuzakerekerdox o û wina qisey kerd: “Bi mîlyonan kesî birêz Ocalanî sey îradeyê xo vînenî. Birêz Ocalan seba aştî û azadîya nê welatî û seba ma pêrûnan xebitîyeno. Tesîrê birêz Ocalanî heme Têgêrayîşanê Azadîye ser o est o. Seba nê, rolê ey tena bi çend babetan sînordarkerdiş raşt nîyo. Ganî ma birêz Ocalanî bi heqîqet û tesîrê ey bivînî. Ma vanî beranê Girawa Îmralîyî akerê û wa rojnamegerî bi xo şêrê ey ra persan bikerê. Tayê îdîayî est ê û zaf spekulasyonî benê. Seba ke vernîya nînan bêra gîrewtene zî ganî birêz Ocalan rasterast çapemenî û komelî reyde bieşko fîkranê xo pare bikero. Xora waştişê birêz Ocalanî zî no yo ke rêxistine û komelî reyde rasterast dîyalog rono. No zî seba averşîyayîşê prosesî lazimtîyêka muhîm o.”
‘Ma hêvî kenî ke heyetê ma rojananê vernîya ma de şêro îmrali’
Ayşegul Dogan derheqê pêvînayîşê heyetê înan ê Rayberê Şarê Kurdî Abdullah Ocalanî reyde zî wina vat: “Wexto ke prosesê pêvînayîşî derg beno, fikarê xetimîyayîşê prosesî zî vejîyenê orte. Ma zî hêvî kenî ke rojanê vernîya ma de heyetê ma şêro Girawa Îmralîyî û pêvînayîş bikero. Ganî nika sîyasetê înkarî û ziwanê ey biqedîyo, ziwanê aştî bêro şuxulnayene. Ma veng danê Meclîsî ke bi mekanîzmayêka newa û bitesîr bîkewa dewre.”
Ayşegul Dogan persê rojnamegeran ser o dîyar kerd ke ganî babeta statuyî bi munaqeşayan wext nêro vîndîkerdene, statuyê Rayberê Şarê Kurdî Abdullah Ocalanî eşkera yo û ganî goreyê heqîqetî bêro erjnayene û vat: “Ganî birêz Ocalan şert û mercanê azadan de prosesî rayra bero, lazimtî bi munaqeşayanê statuyî çin a.”
Ayşegul Dogan derheqê persm “Heyetê Îmralîyî yê DEM Partî do çi wext şêro girawe” de zî dîyar kerd ke plansazîyêka roje û wextî hema nêameya dîyarkerdene.
