Warê mîyaneteweyî de 250î ra zafêr sîyasetmedar, akademîsyen, sendîka û temsîlkarê dezgehanê sivîlan, Komîteya Wezîran a Konseya Ewropa rê mektubêk erşawit û seba Rayberê Şarê Kurdî Abdullah Ocalanî waştişê ‘Heqê Hêvî’ kerd.
Mîyanê nê bi seyan kesan de sîyasetmedarê weçînayeyî, akademîsyenî, sendîkayî, huqûqnasî û temsîlkarê dezgehanê sivîlan est ê. Înan mektubê xo serekê serdemo newe yê Komîteya Wezîran a Konseya Ewropa rê erşawito. Mektubî de ameyo waştene ke qerarê Mehkemaya Heqanê Merdiman a Ewropa (MHME) yo ke derheqê Rayberê Şarê Kurdî Abdullah Ocalanî de ameyo dayene bêro caardene û “Heqê hevî” bêro garantîkerdene.
Goreyê eşkerayî, 20 welatan ra 50 ra zafêr temsîlkarê weçînayeyî, 20 sendîkayî û zaf aktoranê sîvîlan ra 250 ra zafêr kesan nê mektubî îmza kerdo. Îmzakaran veng da Komîteya Wezîran a Konseya Ewropa ke qerarê MHME yê serra 2014î yê dewaya Ocalan/Tirkîya (No.2) bêro bicaardene û ‘heqê hêvî’ bêro garantîkerdene.
Mektubî de wina ameyo vatene: “Eke rejîmê înfazî yê Tirkîya goreyê mesulîyetê heqanê merdiman bêro viraştene, no tena halê Birêz Ocalanî nêvurneno, eynê wextî de bi hezaran girewteyanê bînan rê zî semedê demokratîkbîyayîş û dewleta huqûqî do bibo gamêka muhîme.
Semedê nê prosesê aştî yo ke Tirkîya de dewam keno – ke tede Birêz Ocalan sey muxatabê kilitî rolê xo domnenê – gama winasîne, seba serkewtişê prosesî zî zaf heyatî yo.
Dima mektubê 88 wayîranê Xelata Nobelî yê ke wisarê par erşawitbi û dima muracatê seyan avûkatanê ke waştbi Serek Apo zîyaret bikerê, ame kerdene. Mektubî de ameyo dîyarkerdene ke; ewro semedê çareserîya meselayê kurdî, aştî û demokratîkbîyayîşî yew firsendo tarîxî ameyo meydan. Semedê serkewtişê nê firsendî zî, ganî Serek Apo sey yew temsîlkarê bingeyî yê şarê kurdî rolê xo bi hewayêko azad bica bîyaro û heqê ey ê bingeyinî bêrê garantîkerdene.”
