Heyetê Îmralîyî yê DEM Partî ke tewr peyên 27ê adare de Rayberê Şarê Kurdî Abdullah Ocalanî reyde pêvînayîş kerdbi, no 53 rojî yo nêşîyo Girawe. Canêameyîşê pêvînayîşî, munaqeşayê statuyê Abdullah Ocalanî, nêşîyayîşê Girawa Îmralîyî derheqê prosesî de benê sebebê fikaran.
Heyetê Îmralîyê yê DEM Partî ke tewr peyên 27ê adare de Rayberê Şarê Kurdî Abdullah Ocalanî reyde pêvînayîş kerdbi, 53 rojî yo ke nêşîyo Girawa Îmralîyî. Prosesê Aştî û Komelê Demokratîkî ke bi vengdayîşê Rayberê Şarê Kurdî Abdullah Ocalanî 27ê sibata 2025î de dest pêkerdbî, hema zî rojevo sereke yê Vakurê Kurdîstanî û Tirkîya yo.
Komîsyono ke meclîs de awan bibi, 18ê sibate de raporo hempar amade kerd û xebata xo qedînaye. Raporî ser o 3 aşmî vîyartî zî, hema zî seba viraştişê qanûnan tu programê meclîsî nêameyo eşkerakerdene. Heto bîn ra, munaqeşayê viraştişê qanûnan, statuyê Rayberê Şarê Kurdî Abdullah Ocalanî û tewrbîyayîşê endamanê rêxistine seba sîyasetê demokratîkî dewam kenê.
5ê gulane de, rayberîya Tegêrayîşê Apoyî serrgêra ewilin a kongreya fesihkerdişê PKK’yî de eşkerayîyêka muhîm daye. Eşkerayî de ame vatene ke gamê huqûqî bi lez ganî bêrê eştene, Abdullah Ocalan ganî sey muxatabo fermî bêro vînayene û statuyê ey ganî bêro aşkerakerdene. Wextêko kilmî ra pey Serekê Pêroyî yê MHP’yî Devlet Bahçelîyî zî kombîyayîşê partîya xo de qisey kerd û vat: “Statuyê Abdullah Ocalanî ganî bêro aşkerakerdiş û nameyê ci zî ganî bibo ‘Prosesê Aştî û Koordînatorîya Sîyasî’ bo.”
Goreyê xeberanê kulîsî yê çapemenîya nêzdîye îqtîdarî, AKP û Serekkomar statuyê Rayberê Şarê Kurdî Abdullah Ocalanî qebul nêkeno, la seba ke şert û mercê ey weş bibê, bieşko rêxistine û tay beşanê komelî yê cîyayn reyde bikewo têkilî. Çend xebatê aşkerayî zî est ê ke DEM Partî seba averberdişê prosesî û viraştişê qanûnan şaristananê Vakurê Kurdîstanî û Tirkîya de çalakîya “Gamêk seba aştî” daya destpêkerdene; bi hezaran kesî kuçeyan ra waştişê xo îfade kerdê. Çarçewaya çalakî de Rêxistina DEM Partî ya Anqara waşt ver bi meclîsî rayra şêro la polîsan rayîrşîyayîşî asteng kerd.
Verfeka DEM Partî Ayşegul Dogan eşkerayîya xo ya vizêrî de eşkera kerd ke ê pawenê ke rojanê ameyox de heyetê înan şêro Girawa Îmralîyî û Rayberê Şarê Kurdî Abdullah Ocalanî reyde pêvînayîş bikero, la seba şîyayîşê heyetî tu dem nêameyo dîyarkerdene. Destpêkerdişê prosesî ra nat reya ewilin a ke Rayberê Şarê Kurdî Abdullah Ocalanî ra demêko hende dergî de xebere nêyena girewtiş.. Nêşîyayîşê heyetî welatîyan de zî fikaranê sey “Gelo prosesî de xetimîyayîş est o?” awan keno. Tewr peyên Ayşegul Dogan eşkerayîya xo de îfade kerd ke heyetê înan do rojanê vernîya ma de şêro Îmrali. La eşkerayîya xo de dîyar kerd ke no dem hema zelal nîyo.
