Dewa Çewligî Cafran de dewijan vera birnayîşê daran reaksîyon nîşan da: Sûcdar Şefîya Daristanî ya Çewligî ya.
Dewa Cafranî (Dallitepe) ya ke girêdayê Çewligîya de qetilkerdena birrî reyna dest kerd ci. Muxtarê Dewe û dewijan pîya şî cayo ke bir yeno birnayene û îca de pê yew eşkerayîye reaksîyon nîşan da. Muxtar Cengîz Kişinî vat: Nê birnayîşî ra Şefîya Daristanî ya Çewlîgî û Mudirîya Daristanî yê Çewligî mesûl ê.
Merkezê Çewlîgî de dewa Cafranî de birnayîşê daran yo ke serra 2023 de dest pêkerdbî, nika reyna zî dewam keno. Dewijî vera nê birnayîşê daran ameyî pêser û cayê birnayîşî de eşkerayîye daye. Eşkerayîye de muxtarê dewe Cengiz Kişinî qisey kerd û vat ke bîrnayîşê daristanî yo ke serra 2023î de bi awayêko qaçax dest pêkerdbi, nika zî dewam keno. Kişinî dîyar kerd ke destûrê birnayîşê daran dewijan ra Serkan Kişin û Çelebi Kişinî rê hetê Şef û Mudirîya Daristanî ya Çewligî ra ameyo dayene.
Kişinî vat: “Tîya de reyna darî birnayê. Ma sey dewijan qet yew nêwazenî ke daristan bêro birnayene. Çira bi taybetî nê herdî kesan rê no daristan her serre yeno rotene? Ma dewijî tîya de nêwazenî birnayîş bêro kerdene. Tewrirê ma seba birnêbîrnyena daristanî yo. Meşte tîya de çi problemê ke vejîyê, berpirsiyarê ci şefê daristanî yo.”
Mudirîye: Qet fikrê mi çin o
Derheqê babete de wextê ke ma telefon kerd Mudirîya Karanê Daristanî ya Çewlîgî, keso ke ciwabê telefonê ma da derheqê meseleye de wina vat: “Qet fikirê min çin o. Tîya de birnayîş vindarnîyayo yan dewam keno, agahîya min çin a. Çîyo ke betlaneyê Roşanî yo ay ra kes daîra de çin o. Daîra girewteya” û telefon girewt.
