Afganistan de Rayberîya Talîbanî her ke şona ser cinîyan tade û zilmî zêdînena. Cinîyan verba zilmî bi paştdayişê yewbînan bazarêk awan kerdê û cinîyan dîyar kerdê ke ê qet xoverdayişê xo ra fek veranêdê.
Afganistan de Rayberîya Talîbanî de her roj cinîyan warêk qedexe kena. Cinîyan verba zilmê Talîbanî hem xover danê hem zî paştê yewbînan gênê. Cinîyî yew het ra keyayan de perwerdeyê xo bi nimîte kenê yew het ra zî çalakîyê protestoyî organîze kenê.
Hem derznenê hem zî roşenê
Cinîyan bi îmkananê xo yê kêmî, tewir bi tewir sektorî de xebat kenê. Çarçiweya ci zî Dasht Barchî de bazarêk tena cinîyan ca gênê, awan kerdê. Cinîyan cilûbergê neteweyê afganî hem derznenê hem zî roşenê.
Sahar Qadrî zî bazar de karê rotixî kena, va ke demo ke bêkar menda, no bazar zî ê cinîyan reyde awan kerdê û wina va: “Bazar de ma tena cilê bi deste viraşte, ma roşenê. Nê di aşmê ke ma xebityenê. Ma hem derzenê hem zî roşenê.”
Arefe Suzan zî problemê ewleyî ser o kamera rê qise nêkerda la vata ke a zanîngehê Kabîlî de profesor bîya la Rayberîya Talîbanî berê zanîngehî cinîyan girewta û no ser a zî bazar de destpê karê kerda û wina domna: “Endamê Talîbanî çend ray ameyê ma rê gef wendê, ma seba ke fek karê xo veradê la ma qet karê xo veranêda û ma têkoşînê xo zî do bidomnê.”
