Sêwregi de Komxebata Ziwanê Kurdkî yê Herêma Tolhildanî virazîya. Komxebate de muhîmiya tarîxî ya ziwanê kurdkî ameye dîyarkerdene û ame vatene ke ganî ziwan cuya rojane de hîna zaf bêro qisey kerdene.
Qezaya Sêwregi ya Riha de komxebatê ziwanê kurdkî yê Herêma Tolhildanî virazîya. Komxebate bi serektîya Platformê Sazîyanê Demokratîkan bi sloganê “Statuyê kurdkî, perwerdeyîya bi kurdkî” banê Ziwan Kurd de pê ameye û zaf kesî tede ameyê pêser. Komxebate bi zaravayê kurdkî Kirmanckî-Zazakî ameye rayra berdene.
Aktîvîstê ziwanê kurdkî û nuştox Rifat Ronî moderatorîya roniştişê verênî yê komxebate kerd. Perwerdekar Ferîde Akturan û avûkat Cemîle Turhalli zî sey qiseykerdoxî tewrê komxebate bîyê.
Ferîde Akturan qiseykerdişê xo de bale ante babeta “Perwerdekarî û zafziwanî” ser û dîyar kerd ke perwerdekarî semedê weşmendenê ziwanêko zaf muhîm o. Akturane diyar kerd ke ganî ziwanê Kurdkî bibo ziwanê perwerdeyî.
Avûkat Cemîle Turhalli zî bale ante babeta “Ziwan, huqûq û siyaset” ser û waşt ke qanûnan de bedilnayîşî bibê û ziwanê kurdkî bibo ziwanê perwerdeyî.
Roniştişê dîyin ê komxebate de rayberîya Komeleya Nuştoxanê Kurdan Stran Yaşar moderatorî kerd û perwerdekar Firuzan Demîr, Hemserekê Komeleya Nuştoxanê Kurdan Haci Ozkan û nuştox Ehmedê Bira zî sey qiseykerdoxî amade bîyî.
Haci Ozkan serê babete “Vizêr, ewro û ameyoxê ziwanî” qisey kerd û diyar kerd ke zext û zordarîyê serdestan û netewe-dewlete nêverda ke ziwanê kurdkî raver şêro û bibo ziwanê perwerdeyî.
Firuzan Demîr zî serê babeta “Semedê ke qijî ziwanê maye bimusê teşwîqê medya dîjîtalî” ser vindert û ard ziwan ke her roje ke şona zaravayê Kirmanckî-Zazakî kêmî beno û waşt ke wayîrvejîyayîşê zaravayê Kirmanckî bibo û vat ke semedê wayîrvejîyayîşî zî ganî ziwan bêro musnayene û vilabîyene.
Nuştox Ehmedê Bira zî tewr peynî de qisey kerd û serê babeta “Weşan û medya” de meqaleyêke pêşkêş kerd û bale ante serê kêmîbîyayîşê zaravayê Kirmanckî û venga wayîrvejîyayîşê zaravayê kirmanckî kerd.
