Çarçewaya cipersîyayîşêkê Riha de qeyûmê verên ê Xelfetî Şeref Albayrak ke badê AKP de bibi şaredar, o zî tedede 46 kesî sewqê edlîye ameyê kerdene. Cipersîyayîşî de sucdarîya awankerdişê rêxistina sucê ‘gendelî’ est ê.
Operasyonê 24ê nîsane de ke bi koordînasyonê Serdozgerîya Komare yê Bêrecugî amebi dest pêkerdene, derbasê qonaxê edlîyeyî bi. Çarçewaya cipersîyayîşî de bi sucê “awankerdişê rêxistina sucî” kar û baranê îhaleyan de fesadî, bêusulî û gendelî” kerda, qezaya Xelfetî ya Riha de 50 kesî amebî destbendkerdene.
Îfadeyê 50 kesan ame girewtene
Mîyanê gumanbaran de qeymeqamê verên ê Xelfetî Şeref Albayrak est o ke demêko derg qeza de qeyûmtî kerd û dima ra zî AKP ra şaredarî rayra berd. Sewbîna endamê encumentîya şaredarî yê verênî, personelê yewîneyanê cîya yê şaredarî û tay esnafî zî mîyanê destbendkerdeyan de est bî. Îfadeyê nê kesan ê mudirîyetê polîsan qedîya.
4 kesî ameyê veradayene
50 suc gumanbaran ra 4 kesî dimayê girewtişê îfadeyî înan ê mudirîyetê polîsan bi fermanê dozgerîye serbest ameyê veradayene. 46 kesî mendeyî ke Albayrak zî tede yo, Mudirîyetê Polîsan ê Riha ra vetê û seba kontrolî berdê Nêweşxaneyê Perwerde û Cigêrayîşî yê Mehmet Akîf Înanî. Dimayê nêweşxane, ê 46 kesî seba vetişê vernîya dozgerî sewqê Edlîyeya Bêrecûgî ameyê kerdene.
Hetê bînî ra ame dîyarkerdene ke eyn dosya de derheqê kesêkê bînî de zî qerarê destbendkerdişî est o la o kes hema nêameyo girewtene.
