Merdimê Vîndîbîyayan û şubeyê ÎHD’yî yê Amedî, Êlih, Riha û Colemêrgî çalakîyanê xo de persa aqûbetê Vasif Ozturk, Îsa Gok û Mustafa Saygi kerdê û waştê ke faîlê Namik Erdogan bêrê eşkerakerdene. Çalakîyan de ame waştene ke Roşanê Qurbanî bibo wesîleyê aştîye, aqûbetê kesê ke ameyê vindîbîyayene û faîlê vîndîbîyayan bêrê eşkerakerdene.
Merdimê Vîndîbîyayan û Şubêyanê Komeleya Heqê Merdiman (İHD) yê Amedî, Êlih, Riha û Colemêrgî çalakîyanê xo yê ‘Wa vîndî bêrê vînayene faîlî bêrê mahkemekerdene’ ame viraştene. Merdimê Vîndîbîyayan û Şubeyanê ÎHD’yî nê çalakîyan de persê aqûbetê Vasif Ozturk, Îsa Gok û Mustafa Saygi kerdê û waşt ke faîlê Namik Erdogan bêrê eşkerakerdene.
Amed
Şaxê Komeleya Heqê Merdiman (İHD) yê Amedî û Merdimê Vîndîbîyayan hewteyê 903. de çalakîyê “Wa vîndî bêrê vînayene faîlî bêrê mahkemekerdene” verê cayê Heqanê Merdiman yê Parka Koşuyolu ya qezaya Rezan de ameyê têhet û aqûbetê Vasif Ozturkî ke 1ê Hezîrana 1994 de Pasûr de amebi destbendkerdene û a roje ra nat agahî ey ra nêameya girewtene, persayê. Merdimê vîndîbîyayan, avûkatê heqê merdiman û endamê sazgehanê sîvîlan tewrê çalakî bîyî.
‘Roşanan de goristanî yenê zîyaretkerdene, gorêk keyeyanê ma çin o’
Eşkerayîye de Serekê ÎHD’yê Amedî Ercan Yilmaz qisey kerd û balê ante serê çalakîyanê dergûdila yê vîndîbîyayan û vat: “Roşanan de cayo yewin ke yeno zîyaretkerdene goristanê. La gorêk keyeyanê ma zî çin o. Amancê ma tena vînayîşê goran nîyo, ma eynî demî de wazenê ke faîlê vîndîbîyayan bêrê eşkerakerdene. Ma wazenê roşan heme dinya de bibo wesîleya aştîye, sewbîna kesê ke ameyê vîndîyayene bêrê vînayene û kesê ke bîyî sebebê nê çîyan zî bêrê mehkemakerdene.
Êlih
Êlih de ÎHD û Merdimê Vîndîbîyayan hewteyê 739. de aqûbetê Îsa Gok ke Hezîrana 1994î de amebi vîndîkerdene persa
Colemêrg
Colemêrg de zî hewteyê 229. de aqûbetê Namik Erdoganî ame persayene û ame vatene ke her çend dewa ameya akerdene zî bê netîce menda.
Riha
Riha de keyeyê vîndîbîyayan û avûkatê heqê merdiman hewteyê 75. de aqûbetê Mustafa Saygi yo ke serra 1994î de Pirsûs de vindîbîyo persa û bale ante têkoşînê heqîqat û edalete ser.
Peynîyê çalakîye de seba vîndîbîyayan çalakîyê roniştene ame kerdene.
