HPGyî serrgêra Hamleya 1ê Hezîrane ya 22. pîroz kerd û vat: “Ma do seba demêk zî amancê temînkerdişê azadîya Rayberîye û şarê xo ra dûrî nêkewê.
Merkezê Têkilîû Çapemenî yê HPG’yî, seba serrgêra Hemleya 1ê Hezîrane ya 22. eşkerayîyêka nuşteyî vila kerd. HPGyî vat: “Serrgêra Hemleya Tarîxî ya 1ê Hezîrane ya 22. ke cigêrayîşê azadî, demokrasî û cuya birûmete ya şarê Kurdîstanî de dewrêko muhîm o; bi taybetî Rayber Apo, keyeyanê şehîdan, şarê welatperwer û heme embazan rê pîroz kenê. Hemleya tarîxî ya 1ê hezîrane ke sembolê girêdayîya xeta Apoyî, durustî, cesaret û fedakarî yo, nefere ci yê pêşeng û fermandarê artêşa gerîla ma yê bêmergî Fuat – Ali Haydar Kaytan, Sara – Sakine Cansiz, Adil Bilik, Nûda Karker, Delal Amed û Nûredîn Sofî de heme şehîdanê ma bi hurmet, heskerdiş û minnetêko gird yad kenê.”
Eşkerayîya HPG’yî de nê çîyan zî ca girewt: “Komployê Mîyanneteweyî yê ke 15ê sibate 1999î de şexsê Rayber Apoyî de vera şar û Têgêrayîşê Azadîya Kurdîstanî ame caardene, sey hêrîşêko cebar ê ke amancê ci bêçareserverdayîşê meseleya kurdan û tesfîyeya îradeyê ameyoxê azadî yê şarî bî, vîyart tarîx. Rayber Apoyî bi sebr, dîrayet, xoverdayîş û îsrarêko gird, binê şertanê Sîstemê Îşkence yê Îmralî de zî, bi Paradîgmaya Komelê Demokratîk û Ekolojîk ê Bingeyê Azadîya Cinîye, vera nê hêrîşî perspektîfê çareserîya demokratîk û cuya hempar vete.
Hêzanê ma yê gerîla zî bingeyê nê nêzdîbîyayîşê Rayber Apoyî ser o qerarê apeyşîyayîşî yê 2ê tebaxe 1999î ra heta 1ê hezîrane 2004î, demê panc serran de pozîsyonê adirbestî pawit û seba çareserîya demokratîke ya meseleya kurdan zemînêko xurt awan kerd. Vera naye, dewleta tirke herinda ke no proses ver bi çareserîya demokratîke bierjno, cehd kerd ke sey hacetêkê tasfîyekerdişê Têgêrayîşê Apoyî bişuxulno. Mîyanê nê demî de nêaverşîyayîşê gamanê mende û samîmîyan ê ver bi çareserîye, dewamkerdişê polîtîkayanê înkar û tesfîye, bî sebebê vejîyayîşê dewreyêkê neweyî yê tarîxî. Hemla 1ê hezîrane 2004î, binê nê şertan de sey vejîyayîşêko muhîm ê bingeyê pawitişê estbîyayîş, îrade û waştişê cuya azade ya şarî ser o vejîya meydan.
22 serrê ke vîyartî, reyna mojna ke meseleya kurdan bi polîtîkayanê zordarî, înkar û bêçareserîye nêeşkena bêro hewanayene. Eynî proses, fikrê Rayber Apoyî yê bingeyê çareserîya demokratîk, yewîya şaran, azadîya cinîye û komelê demokratîk ser o, bi prosesêkê têkoşînî yê çetinî ame ceribnayene, heqdarîya înan bi hukmê tarîxî ame îsbatkerdene. Ewro zî rayîrê çareserîya mende ya meseleya kurdan; qedênayîşê nêzdîbîyayîşê klasîkî yê dewlete yê Rayber Apoyî ser o, temînkerdişê azadîya ci ya temamîye, girewtişê rolê ci yê sey muzakerekarê sereke yê şarê kurdî, akerdişê verê sîyasetê demokratîkî û têhetbîyayîşê şaran ser o bingeyê cuya hempar û azade reseno. Esasgirewtişê perspektîfê çareserîya demokratîke ya Rayber Apoyî û caardişê hewceyê ci bi cîdîyet hetê dewleta tirke ra, tena seba şarê kurdî ney, seba ameyoxê hemparî yê şarê Tirkîya û Rojhelatê Mîyanênî û betalkerdişê plananê herême ser o zî muhîmîyêka tarîxî ya.
Sey Gerîlayanê Azadîya Kurdîstanî ke xeta mîlîtanîya fedayî ya apoyî de xorîn benê, bi şûurê berpirsîyarîya tarîxî vanê; ma do tu wext destûr nêdê ke cehdê bêemsalî yê Rayberî û erjê ke şarê ma bi bedel û keda girde afirnayî, vindî bibê. Seke heta ewro bî, nika ra dima zî bê ke tu tereddudêkê tewr qijî biciwîyê, bi îradeyêko gird hereket kenê. Bi temsîlkerdişê ruhê fedayî yê Apoyî sewîyeya tewr berze, do amancê temînkerdişê azadîya Rayberî û şarê xo ra seba demêk zî dûrî nêkewê. Qerardarîya xo ya têkoşînî bi ruhê fedayî yê Apoyî, mîyanê her şertî de, bi rayîr û metodanê dewlemendan, reyna bi tewirêko xurt îfade kenê.”
