DEM Partî, Savaş Buldan, Adnan Yildirim û Haci Karay ê ke 3yê hezîrana 1994î de ameybî kiştiş, bi merasîmek yad kerd. Pervîn Buldan wextê yadkerdişî de dîyar kerd ke Savaş Buldan, Adnan Yildirim û Haci Karayî 3 dîyarîyî seba înan verdayê û vat: “Yew Zelal Buldan a, yew kincê bigonî yê, yew zî têkoşînêko birûmet o.”
Savaş Buldan, Adnan Yildirim û Haci Karay 32 serran ra ver, 3yê hezîrana 1994î de Stenbol de hetê 7-8 hêzanê paramîlîteran ê bi çek ra ameybî destbendkerdene. Dima ke keyeyan hedîse eşnawite, ca de muracatê Dozgerîya Komarî ya Bakirkoyî kerd, serekwezîr û walî reyde pêvînayîşî kerdî. Labelê cewabê “nêameyê destbendkerdene” ame dayene. 4ê hezîrane de nêzdîyê qezaya Yigilca ya Boluyî de, cenazeyê Savaş Buldan, Adnan Yildirim û Haci Karayî ke îşkence dîbi, hetê dewijan ra ameyî vînayene.
DEM Partî, Savaş Buldan, Adnan Yildirim û Haci Karay ê ke Goristanê Avcilar ê Stenbolî de ameyê definkerdene, bi merasîmek yad kerdê. Hemserekê Pêroyî yê DEM Partî Tuncer Bakirhan, Endama Heyetê Îmralî ya DEM Partî û embaza Savaş Buldanî Pervîn Buldan, keyeyê Adnan Yildirim û Haci Karayî, Hemverfeka HDK’yî Meral Daniş Beştaş, Dayîkê Aştî, parlamenterê DEM Partî û xeylê kesî tewrê yadkerdişî bîyê.
Program seba Savaş Buldan, Adnan Yildirim û Haci Karayî deqeyêk rêzgirtişî reyde dest pêkerd.
‘32 serrî vîyartî labelê kiştoxî hema zî nêameyî muhakemekerdiş’
Kênaya Adnan Yildirimî, Leyla Yildirim wextê yadkerdişî de qisey kerd û vat: “Serranê tarîyan de Savaş Buldan, Adnan Yildirim û Haci Karayî waştêne ke bi rûmet bîciwîyê û seba şarê kurdî têgêrayênî. 32 serrî vîyartî labelê kiştoxî hema zî nêameye cezakerdiş.”
‘Polîtîkayê bêcezakerdişî kewtî merîyet’
Meral Daniş Beştaş zî dîyar kerd ke dejê keyeyan hema zî dewam keno û vat: “Ganî aştî seba pêro embazanê ma bêra. Labelê seba kiştoxan gêrayîş çin o. Çend dewayî ameyî akerdiş labelê polîtîkayê bêcezakerdişî kewtî merîyet. Ma zanê ke bi waştişê îqtîdarî na polîtîka yena rayraberdene.”
‘Ganî no proses birûmet rayra şêro’
Pervîn Bûldan wextê yadkerdişî de da zanayene ke 3 embazê înan 32 serran ra ver ameyî kiştiş û vat: “Labelê 3 dîyarîyî seba ma verdayî. Yew Zelal Buldan a, yew kincê bigonî yê, yew zî têkoşînêko birûmet o. Labelê kiştoxî her wext ameyî pawitiş. Bi hezaran merdimî ameyî kiştiş û kiştoxê înan hetê dewlete ra ameyî pawituş. Senî ke ma wazenî kiştişê Gulîstan Doku bêro roşnkerdiş, ma wazenî hedîseyê verênî zî bêrê roşnkerdiş. Ewro prosesêk rayra şono. Labelê ganî no proses bi rûmet rayraşêro ke ma vajê ‘Zelal, na aştî yê to ya.’ Sozê ma est o ke aştîyêka birûmet bêra nê welatî, labelê ganî pêro kiştoxî bêrê vînayene.”
‘Seba ke aştîyêka birûmet awan biba ganî ê rîpelê sîyayî bêrê roşnkerdiş’
Tuncer Bakirhanî zî dîyar kerd ke ê hêvî kenê ku kiştoxê nê embazan vejîyê vernîya edaletî û nê çîyî ardî vatî: “Savaş Buldan, Adnan Yildirim û Haci Karay, seba ke kurd bîyî ameyî kiştiş. Ma vanî ganî kiştoxî bêrê vînayene ke zerrîya keyeyan şa bîba. Ewro aştî est a labelê aştî, vîr rakerdişê Savaş Buldan, Adnan Yildirim û Haci Karayî nîya. Seba ke aştîyêka birûmet awan biba ganî ê rîpelê sîyayî bêrê roşnkerdiş. Wa soz bêro dayene ke seba Savaş Buldan, Adnan Yildirim, Haci Karay û hezaran merdimên ke ameyî kiştiş ke faîlê înan bêrê vînayene û ê bêrê muhakemekerdiş.”
Yadkerdiş bi duayan qedîya.
