Raybera ANKA-DER’î Emîne Oguz dîyar kerd ke ê do 7ê hezîrane de Anqara de komxebata ziwanê Kurdkî virazê û vat: “Amancê ma yê na komxebate statu û heqê perwerdeyê bi ziwanê Kurdkî yo. Dimayê na komxebate, 26-27ê hezîrane de zî sey encamê nê komxebatan do Amed de Konferansê Ziwanê Kurdkî bêro viraştiş.”
Komela Ziwan, Kultur û Hunerî ya Ankayî (ANKA-DER) ke Anqara de xebatanê kultur û ziwanê Kurdkî kena, do bi sloganê “Statuyê Ziwanê Kurdkî û Perwerdeyê bi Kurdkî” 7ê hezîrane de Anqara de komxebata ziwanê Kurdkî viraza. Komxebata ke do bi 4 roniştişan bêra viraştiş, do Merkezê Bazirganîya Dinya yê qezaya Çankaya ya Anqara de bêra viraştiş. Sazgeh û dezgehê kultur û ziwanê Kurdkî, partîyê sîyasî, rêxistinê sivîl û xeylê kesî do tewrê na komxebate bibê.Raybera ANKA-DER’î Emîne Oguz derheqê babete de seba ajansê ma rê qisey kerd.
Emîne Oguz da zanayene ke amancê înan garantîkerdişê heqê ziwanê Kurdkî yo û wina dewam kerd: “Prosesê Aştî û Komelê Demokratîk de ma wazenî xebatanê ziwan û kulturê Kurdkî hîna zêde xurt bikerî. Ma na komxebate zî paytextê Tirkîya Enqere de kenî. Anqara seba waştişê heqê ziwanê Kurdkî merkezêko zaf muhîm o. Nê prosesî de ma wazenî kurdî waştişanê xo yê ziwanî ser o reyna bîyarî vîrê xo. Babeta ziwanî babeta sereke û muhîm a. Amancê ma yo verên o yo ke heqê perwerdeyê ziwanê Kurdkî bêro ca.”
Babete û tedeyîya komxebate
Emîne Oguz derheqê tedeyîya komxebate de zî dîyar kerd ke heme çî do bi 4 roniştişan rayra şêra û tedeyî wina pare kerdê: “Roniştişê ewiline de ciwanî do heqê ziwanî û mîsyonê ciwanan ê mîyanê têkoşînê ziwanî ser o qisey bikerî. Ciwanan reyde zî awankerê Kurdolîngoyî Cîhat Îlbaş do zîrekîya viraşte û nê warî de şuxulnayîşê ziwanê Kurdkî ser o munaqeşa yan bikero. Roniştişo dîyine de heqê ziwanê Kurdkî do hetê huqûqî ra bêro munaqeşakerdiş. Astengîya tewr pîle ya vernîya statu û perwerdeyê ziwanê Kurdkî hetê huqûqî yo. Ziwan do hetê huqûqî ra çawa bêra pawitiş? Nê prosesî de behsê huqûqêko newe yeno kerdene. Nê huqûqê neweyî de heqê ziwanê Kurdkî do senî ca bigîro? Nê do bêrê erjnayene. Avûkatê Komela Huqûqnasanê seba Azadîye (OHD) û Buroyê Huqûqî yê Asrînî do di nê roniştişî de qisey bikerî. Roniştişê hîrêyine de zî sazgehê ke heqanê merdiman ser o xebitîyenê do hetê heqê perwerdeyê ziwanî ra munaqeşayan bikerî, fikranê xo ma reyde pare bikerî. Ziwan heqêko sereke yo û ma waşt ke sazgehê heqanê merdiman zî nê beşî de qisey bikerê. Roniştişê peyênî de zî sîyasetmedarî do qisey bikerî. Parlamentera DEM Partî Newroz Uysal Aslan do qisey bikera û hetê tarîxî ra zî Kurdolog û nuştox Mehmet Bayrak do zanayîş û cigêrayîşanê beşdaran reyde pare bikero.”
‘26-27ê hezîrane de do Konferansê Ziwanê Kurdkî Amed de bêro viraştiş’
Emîne Oguz dîyar kerd ke komxebata Anqara do biba komxebata 4. ya ziwanê Kurdkî û qiseykerdişê xo wina domna: “Heta nika ma Wan, Cizîr û Sêwregi de zî komxebatî viraştî. Dimayê na komxebata Anqara, 26-27ê hezîrane de Amed de sey encamê nê xebatan ma do konferansêk virazî. Na komxebate zî sey amadekarîya nê konferansî ya. Ma do komxebate de rewşa kurdanê Anqara û Anatolîya Mîyanên, problemê ke hetê ziwanî ra vejîyenê orte, înan zî munaqeşa bikerî.”
‘Medyaya dîjîtale ser o zî ganî kar û xebatê Kurdkî hîna hîra bibî’
Emîne Oguz îfade kerd ke dimayê konferansî zî xebatê înan ê ziwanî ser o do dewam bikerî û wina vat: “Amancê sazgehanê ziwanî o yo ke xebatê ke ziwanî, statu û heqê perwerdeyê ziwanî ser o yê, înan vejê vernî. Ma do dimayê na komxebate zî kar û xebatanê xo yê ziwanî ser o bidomnê. Kursê ma yê ziwanî her wext akerde yê. Bi panel û programanê cîya cîyayan ma do waştişê heqê ziwanê Kurdkî vejê vernî. Ma wazenî babeta ziwanî medyaya dîjîtale de zî aver berî. Ma wazenî Anqara de sey studyoyê medyaya dîjîtale akerê ke ziwanî ser o xebitîyeno. Ewro babetê ke vejîyenê vernî, pêro medyaya dîjîtale ser o vila benê. Ganî ma hêzê xo nê ware de hîna hîra bikerî.”
‘Bêrê ma statu û perwerdeyê bi Kurdkî pîya munaqeşa bikerî’
Emîne Oguz peynîye de seba tewrbîyayîşê komxebate nê vengdayîşî kerd: “Na komxebate seba kurdanê Anatolîya Mîyanên û kurdanê ke Kurdîstan ra koçê Anqara kerdo zaf muhîm a. Ma veng danê pêro merdiman ke bêrê ma heqê perwerdeyê ziwanê Kurdkî û statuya Kurdkî pîya munaqeşa bikerî. Ma pêro şarê xo û ê kesan ke paştî danê ma silaynenê komxebate. Ma tena meverdê û bêrê cayê xo mîyanê komxebate de bîgîrî.”
