Cinîyê Helebî bale ant rayberîya newe ya Sûrîye ser o û wina vat: “Ronayîşê newe yê hukmatî de ca nêda cinîyan. Eksê ci kesê ke destê înan de gonîya şar û bi taybetî yê cinîyan est a, hukmatî de ca girewto. Ma nê çîyî red kenê.”
Partîya Ameyoxe ya Sûrîye bi sloganî “Ameyoxê Sûrîye ver bi kamcayî şono” komaxebatêk viraşte. Na komxebate salona Mediya ya ke taxa Eşrefîye de ca gêna, ameye kerdene. Bi tewrbîyayîşê 17 partîyanê heme cayê Sûrîye ameye kerdene. Cinîyî ke komxebate de amade bîyê wina vat: “Ganî rol û mîsyonê cinîyan Sûrîye de newe ra bêrê tesbîtkerdene. Ma ê kesan ke hukmatê newe yê Sûrîye de ca girewto qebul nêkenê ke destê înan de gonîya şar û cinîyan est a. Ma seba Sûrîyêka newe têkoşîn danê.”
Seba Sûrîyeya newîye êşkêşkerdişî ewnîyayîşan
Hemsereka Partîya Ameyoxe ya Sûrîye Kewser Doko derheqê komxebate û awankerdîşê Sûrîyeya newa de Ajansa JINNEWS’î rê qisey kerd û wina vat: “Na komxebeta ma de ma heme partîyê sîyasî ke Sûrîye de xebitiyenê ca girewt ke ma pîya rewşa Sûrîyeya newîye de nîqaş bîkerê. Tîya de gelek kesê sîyasetmedar, zanyar û hûqûqnasî amade bîyî. Çîyo muhîm seba ma o bi ke ma seba Sûrîyeya newîye fikranê xo pêşkêş bikerê.”
‘Kar û xebat seba Sûrîyeyêka ke merkezî nîya yî’
Kewser Doko da zanayene ke ganî Sûrîyeya newîye ver bi rewşêka demokratîk şêra û wina dewam kerd: “Sûrîye ser o ra nêm seserrî vîyartî la şarê ser o bi ferzkerdişê dîktatorîye Sûrîye ameye îşxalkerdene. Nika ra pey ganî Sûrîyeya newîye bi demokratîkbîyayîşî vejîye vernî. Xora prensîbanê ma yê serekeyan ra yew o yo ke ma Sûrîyeyêka ke demokratîk û merkezî nîya awan bikerê. Xora kar û xebatê ma nê esasan ser o yê.”
Amancê komxebate
Kewser Doko destpêkî de da zanayene ke komxebatê derheqê cinîyan de muhîm î û wina vat: “Na komxebata yewin a ke asta Sûrîyeyî de yena ronayene. Goreyê ewnîyayîşanê ke na komxebate ra vejîyayî do na komxebate nê ya peyêne. La do bi berdewamî bêrê ronayene ke ma pîya biresê encamê ke yenê waştene. Ganî heme Sûrîye bi aramî pîya biciwîyê û qadanê ekonomî, sîyasî de bibi yew dest.”
‘Rolê cinî çin bo demokrasî zî do çin bo’
Berdewamîya qiseykerdişê xo de Kewser Doko da dîyarkerdene ke Sûrîyeyêka ke rengê cinîyan tede çin bo do nêba Sûrîyeyêka demokratîk û wina qisey kerd: “Mîyanê awankerdişê welatêkê neweyî de eke rolê cinîyan çin bo do nêbo Sûrîyeyêka demokratîk û azad. Teqez do bi destê welatîyanê Sûrîyeyî na dîkdatorîya ke nika est a, biqedîya.”
‘Kiştoxan hukmatî de ca girewt’
Endama Partîya Ameyoxe ya Sûrîye ya şaristanê Helebî Zelox Reşîd qiseykerdişê xo de bale ant komxebate ser o û wina dewam kerd: “Bi amadebîyayîşê gelekî partîyanê sîyasîyan derheqê senîyîya Sûrîyeya newîye de ewnîyayîşê ameyê dayene û parekerdene. La îlankerdişê Sûrîyeya newîye de kesayetê ke bi kiştoxîya xo yenê şinasneyene, ameyê wezîfedarkerdene. Sey nimûne Ebo Şeqra sekretera pêroyî ya Partîya Ameyoxe ya Sûrîye Hevrîn Xelef bi destê ey ameye kiştene. Tena o ney la her kes zano ke Ebo Şeqra şarê Efrînî ser o çi kerdeyê ey ê xirabî est ê.”
