Birayê Dayîka Aştî Munîbe Koç a ke çend roj verê cû cuya xo ra bîbî, Adem Yilmazî îfade kerd ke Munîbe Koç her tim seba aştî û azadîye mîyanê têkoşînî de bîya û vat: “Bawerîya aye aştî rê her tim bîbî. Xo û rêxistina xo ra bawer kerdêne.”
Endamê Meclîsê Dayîkanê Aştî Munîbe Koç ke bi serran o seba aştî têkoşîn kerdênw nêweşîya kanserî ver, 14ê hezîrane de cuya xo ra bîye. Munîbe Koç serra 1956î de dewa Mucucî ya Erdexanî de maya xo ra bîya. Cuya Munîbe Koç zî sey her Kurdîstanijêk mîyanê teda û têkoşîn de vîyart. Munîbe Koç gede û birayê xo têkoşînê azadîya Kurdîstanî de vindî kerdê. Munîbe Koç bi xo zî cinîyêka têkoşêr bîye. Aye serra 1996î de tewrê endamanê Meclîsê Dayîkanê Aştî bena û a roje ra heta peynîya emrê xo, seba aştî têkoşînî ra fek veranêdana.
Munîbe Koç badê xeylî tecrubeyanê têkoşînê aştî daraxêko ke prosesê Aştî û Komelo Demokratîkî ameyo destpêkerdene cuya xo ra bîye. Munîbe Koç ke demêko derg nêweşxaneyêkê Anqara de kanserî ver ameyêne dermankerdene, 14ê hezîrane de cuya xo ra bîye. Embaza Munîbe Koç, Berbang Aydin û birayê aye Adem Yilmaz derheqê cuye û têkoşînê aye de qisey kerd.
‘Têkoşerê aştî û azadîye bîye’
Berbang Aydin îfade kerd ke 25 serrî yo ke Munîbe Koçe nas kena û wina qala aye kerd: “Ma dayîka Munîbe reyde sey keyeyêk bîyê. Aye hem pîla ma û hem zî hemrayîr bîye. Wexto ke mi dayîka Munîbe nas kerd, birayê aye tewrê têgêrayîşê azadîye bibî û dima ra lajê aye tewr beno. Aye bi xo têkoşera aştî û azadîye bîye. Eynî demî de cinîyêka kedkare bîye û seba ke mêrdeyê aye her wext nêxebetîyayêne debara keyeyî zî kerdêne. Dayîka Munîbe hetê ekonomî ra zî cinîyêka xoser bîye. Tengasîyê ekonomî tesîrî aye nêkerdêne.”
‘Seba aştî her tim bawerîya aye bî’
Berbang Aydin dîyar kerd ke Munîbe Koç tesîrî dorûverê xo zî kerdêne û wina dewam kerd: “Dayîka Munîbe Koç Anqara de koçber bîye la aye her tim nas û dostanê xo reyde mîyanê têkilîye de bîye. Mîyanê nas û dostanê xo de xeylî amêyêne heskerdene. Tesîrêko gird hemînan ser o kerdêne. Dayîka Munîbe her wext mîyanê çalakî, xebat û têgêrayîşê de bîye. Cuya aye zafêrî mîyanê têkoşînê azadîye de derbas bîye. Tewrbîyayîşê lajê xo ra sereberze bîye. Lajê xo ra zaf hes kerdêne. Ge-ge ma bêhêvî byêne la dayîka Munîbe her tim bihêvî bîye. Ma ra her tim vatêne: ‘Do aştîyêk virazîya û gedeyê ma agêrê. Nê demanê peyênan de nêweşîyêka girane aye de peyda bî, dermanê giranî xebitnayêne la reyna zî qet bêhêvî nêbîye.”
‘Heme keyeyî rê bîbî dayîke’
Birayê Munîbe Koç Adem Yilmazî zî îfade kerd ke waya ey Munîbe Koç tedaya dewlete û koçberîye ver xeylî dejî antê û vat: “Ma keyeyêko welatperwer ê. Keyeyê ma de kesê ke tewrê rêxistinê bîyî zî est ê. Sewbîna şehîdê ma zî virazîyê. Seba nê zî têkoşînî tesîrî heme endemanê keyeyî ser o zî kerd. Badê mergê dayîka ma, barê waya Munîbe giran bi û aye ma rê hem wayîye û hem zî dayîtîye kerd. Heme keyeyî rê bîye dayîke. Serranê 1980î de bêçareyîye û tedayanê sîyasî û komelkî ver koçê Anqara kerd. Mîyanê koçberîye de cuyêka têkoşer awan kerd. Aye dayîka 2 kênayan û lajêk bîye. Lajê aye tesîrê rêxistine de mendbi û tewrê şorişî bibi. Badê demêk şehîd kewt.”
‘Qet pey de game nêeşte’
Adem Yilmazî dîyar kerd ke Munîbe Koç badê koçberîya Anqara zî xeylî reyî teda û şîdetî reyde rî bi rî mende û dewam kerd: “Xeylî reyî ameye destbendkerdene, xeylî teda û zordarî dîyî, la qet pey de game nêeşte. Dayîyêka hetê hîsan ra welatperwer û xurt bîye. Hem hetê ekonomî û hem zî hetê teda û şîdetî ra xeylî zehmetî antê. La tîya de xeylê kesî nas kerdê û înan rê hemrayî kerd. Mîyanê xebatanê Dayîkanê Aştî de ca girewt. Dayîkêka bêemsale bîye. Xeylî çî bi mana dîyêne û şîroveyê biaqil kerdêne.”
‘Şehadetê lajê aye hêvîya aye zî zerrî de verda’
Peynîya qiseykerdişê xo de Adem Yilmazî îfade kerd ke Munîbe Koç 2 serrî yo ke nêweşîya kanserî ver, xover dayêne û vat: “Nêweşîya kanserî aye de peyda bîye û aye nêzdî 2 serrî yo ke na nêweşîye ver têkoşîn dana. Nê demanê peyênan de ver bi başîye zî şîyêne la badê şehadetê lajê aye nêweşîya aye giranêr bîye. Hêvîya aye est bî ke lajê aye agêro. Coka zî seba agêrayîşê lajê xo hêz girewtêne. Badê ke şehadetê lajê xo eşnawit, hêvîya aye zerrî de mend. Waştêne ke xo biresna lajê xo. Bawerîya aye ya aştî her tim bîbî. Xo û rêxistina xo ra bawer bîye. Endama Dayîkanê Aştî bîye û zîyaretê Dayîkanê Aştî seba ma bî serberzîyêk a. Ma Dayîkanê Aştî û heme şarê kurdî rê serweşîye wazenê.”
