Amed – Muracatê kurs û atolyeyanê dewrê neweyî yê KASEDî ke dest pê kerdê, do heta 16ê temmuze dewam bikerê. Endama KASEDî Sîdar Aslane derheqê atolyeyanê xo yê neweyan ke do seba cinî û domanan dest pê bikerê de wina vat: “Ma eşkenê hunerê xo, sanikanê xo pîya biafernê û awan bikerê.”
Komeleya Rewşenbîrî, Huner û Edebîyatî ya Cinîyan (KASED) amadekarîyê dewrê neweyî yê kurs û atolyeyanê xo da destpêkerdene. Komeleya ke sala 2019 de bi sloganê “Huner seba her kesî yo” hetê grûbêka hunermendanê cinîyan ra Amed de ame ronayene, nika xebatanê xo awanîya xo ya qezaya Sûrî de domnena. Programê dewrê neweyî yê komeleye sey di kategorîyanê bingeyênan “seba cinîyan” û “seba domanan” ameyo barekerdene. Muracatê atolyeyan ke 1ê hezîrane de dest pê kerdê, do heta 16ê temmuze dewam bikerê. Çarçewaya kursanê ke seba cinîyan ameyê amadekerdene de, perwerdeyê enstrumananê muzîkî yê sey erbane û tembûre, dersê govende û resimî, sewbîna zî perwerdeya vengî estê. Kategorîya domanan de zî kursê pîyano, govende û resimî ameyê plansazkerdene. Hetê qursanê perwerdeyî ra, KASED do dewrê neweyî de seba cinîyan atolyeya Vilikanê Wişkan, xebatê boyaxkerdişê kerran, cam, tuval û aynayan, atolyeya viraştişê deqan û romana Kurdkî organîze bikero. Endama KASEDî Sîdar Aslane derheqê programê qurs û atolyeyanê dewrê neweyî de ajansê ma rê qisey kerd.
‘Mîsyonê KASEDî no yo ke neseypêyî meydan wedaro’
Sîdar Aslane îfade kerd ke wextê ke KASED amê ronayene, goreyê mîsyonêk amê ronayene û vat: “Sey mîsalî, wextê ke ma komelê xo erjnenê, ma vanê her çend komel de neseypêyî bibo, hetê hunerî ra zî o neseypêyî esto û mîsyonê KASEDî zî no yo ke neseypêyî werte ra wedaro. Seba cinîyanê ke wazenê ziwanê xo, kulturê xo, sanika xo û hunerê xo awan bikerê; waşt ke dezgeyêko wina awan bikerê û bi nê mîsyonî vejîyayê rayîr û dest bi xebatanê xo kerd.”
‘Cinî zaf hetan ra ameyê astengkerdene’
Dewamê qiseykerdişê xo de Sîdar Aslane dîyar kerd ke wextê ke verî ra heta nika erjnenê, cinî zaf hetan ra ameyê astengkerdene û nê çîyî vatî: “Wextê ke merdim erjneno, helbet cinî na babete de bi rastî zî têkoşînê de yê. Eya ameyê astengkerdene, firsend nêameyo dayene, wextê ke firsend danê cinîye, cinî bi raştî zî eşkena her hetî ra zaf çîyan, seba xo, seba komelî û seba ameyoxî zî zaf xebatan bikero. Ez eşkena xo sey mîsalî bida, o firsend seba ma zaf biqîmet o. Zaf nuştoxî estê sey Virginia Woolf wextê ke vana ‘Odeya her kesî bibo’, zaf cinîyî eşkenê aye ode de dînayêka newe awan bikerê. Wextê ke na qiseye vana, bi raştî zî o têkoşîno ke ver de yo, odeyêk awan kerda û na babete de berhemê xo awan kerdê. Wextê ke cinîye fersat vînena, bi rastî zî zaf çîyan afernena û aver bena.”
‘Xeylê may û domanî KASEDî sey keyeyê xo vînenê’
Sîdar Aslane bale ante ser Atolyeyanê KASEDî û wina dewam kerd: “Hem seba cinîyan hem zî seba domanan programêko zaf rengîn ameyo amadekerdene. Amancê ronayîşê KASEDî bi tayê krîteran ra girêdaye yo. Vernî de seba cinî û domanan, ma xebatanê xo domnenê. Firsendê ke cinîyan nêdîyê, çi cinîyê ciwanî bê, çi yên ke keye de kar kenê, çi zî domanê ke firsendê xo zaf cayan de, waranê cîya-cîyayan de nêdîyê, xebatanê xo uca de nêdomnayê, eşkenê bêrê û KASED de ca bigîrê. Ma bi nê firsendan wazenê KASED de her parçeyê hunerî awan bikerê.
Goreyê waştişan, ma zaf branşan weçinenê.
Wextê ke ti nê branşan weçinena, ma erjnenê ka kam zî çi wazeno. Sey mîsalî kursê ma yê winasî estê, la tayê kesî vanê ke govende, tayê kesî vanê ke ez pîyano wazena. Yan zî seba domanan zî no çî bi feyde yo. Yan zî goreyê waştişanê ke ê wazenê, kamca de wazenê biafernê, goreyê waştişê komelî, cinîyan yan zî domanan, ma qerarê nê qisman danê. Verê Rezan de bî komeleya ma. Nika ma Sûr de yê, verê cû wextê ke kesê ke ameyêne, cinî yan domanî, hinî verfikar nêzdî biîyêne. Wextê ke ameyêne, pers kerdêne û vatêne: ‘Ma eşkenê nîya çi bikerê?’ Verê de o rehetî çînî bî, la game bi game wextê ke ameyêne, şinasnayîşêk virazîyayêne. Û vînayene ma huner danê û ê yenê karê xo yê hunerî kenê, nika têkilîyekê esta, şinasnayîşêk esto. Game bi game tîya beno sey warêk ke xo tede vînenê û hîs kenê.Wextê ke yenê dest pê kenê, peynî de ma vînenê ke warê ziwan û kulturê xo de, ê hişmendîyekê awan kenê. Nêzdîyê hîrê serran o tîya yê, zaf may û domanî wextê ke yenê, bi rehetî sey keyeyê xo vînenê.”
‘Ma eşkenê sanikanê xo pîya biafernê û awan bikerê’
Sîdar Aslane peynîya qiseykerdişê xo de îfade kerd ke hinî wextan kursê neweyî akerdê û serê hamnanî de qerar dayê ke reyna dest bi qursan bikerê û qiseykerdişê xo wina dewam kerd: “Reyna ma zaf kurs û atolyeyî amade kerdê ke cinî û domanî tede ca bigîrê. Zaf qismê hunerî estê. Sey mîsalî; atolyeya kayanê tebîîyan, atolyeya boyaxkerdişê kerran, atolyeya romana kurdkî. Tayê nê atolyeyan goreyê mayanê ke keye de yê ameyê amadekerdene. Mayê ke nêeşkenê tembûre weçinê, çike wextê înan zaf çin o, la eşkenê bêrê û nê atolyeyan de ca bigîrê. Tayê vanê o atmosfero ke keye de esto, firsend çin o ke şêrê cayêk; la eşkenê bêrê tîya, firsend seba xo bivênê û bi nê atolyeyan hinî xo hîs bikerê.No atmosfer seba înan zaf baş o. Bi rastî, ma parekerdişê xo kerdê, xebatê ma dewam kenê. Karê înan, berê ma seba înan akerde yo. Ma pîya, sey ma yewbînî şinasnenê, ma eşkenê hunerê xo, sanikanê xo pîya biafernê û awan bikerê. Ma şinasnayîşê xo tîya pîya parve bikerê.”
