Nuştox Muslum Yucel embazê rojnameger Bayram Balciyî, dîyar kerd ke aşma nîsane de Bayram Balciyî ey rê mesajêk erşawito û vato ke o vîrameyîşanê xo yê serranê rojnamegerîye nuseno ke bikero kitab û wina vat: “Bayram hem xebitîyayêne hem zî paştî dayêne embazanê xo. Wayîrvejîyayîşê Bayram Balciyî, bi domnayîşê kar û rojnamegerîye beno.”
Rojnameger û şaîr Bayram Balci (63) ke Ewropa de 7 serrî rîyê nêweşîya penceşêrî derman bîyêne, nêweşxaneyo ke tede ameyêne dermankerdene, uca de cuya xo ra bi. Bayram Balci, kedkaranê verên ê rojnameya Ozgur Gundemî ra yew bi. Serranê 1990î de, wextêko winasîn de ke binpaykerdişê giran ê heqanê merdiman qewimîyayêne, seba xeberanê ke viraştêne zaf reyî ame tehdîtkerdene û derheqê ey de dewayî ameyî akerdene. Bayram Balci, 34 serran ra zafêr Çapemenîya Azade de xebitîya û edîtorîya serwîsa kulturî ya Medya Haber TV’yî kerdêne.
Embazê rojnameger Bayram Balci Nuştox Muslum Yucelî ma rê behsê hemrayê xo kerd.
‘Ez wazena bixebitîya û ez sosyalîst a’
Muslum Yucelî dîyar kerd ke Bayram embazê ey o verên bi û wina qisey kerd: “Wexto ke mi eşnawit Bayram Balci cuya xo ra bîyo, ez zaf xemgîn bîya. Hişê mi şi vîrameyîşanê ma yê Rihayî ser o. Serranê 90î de rewşe zaf xirab bîye, dewî ameyêne vêşnayene û vengkerdene. Hetêk de şer est bi, hetêk de zî xoverdayîş. O wext JÎTEM û Kontrogerîlayî est bîyê. Ma zî Riha de Rojnameyê Yenî Ulke vila kerdêne. Rojnameyî hewte de rojek ameyêne çapkerdene û eleqeyêko zaf pîl est bi. Dima ame vatene ke ‘ma do rojnameyî her roje çap bikerî, nameyê ci zî Ozgur Gundem o’. Ma zî zaf sereberz bîyî. Dima rojêk Bayram Balci ame buroyê ma û va ‘ez wazena bixebitîya.’ Ma zî vat ti kam î, ey zî vat ‘ez sosyalîst a.’ Dima ame û vat ‘ez Mustafa Karasuyî nas kena.’ Ma zî vat temam, dest bi xebate bikere. Riha de sey muxabir xebitîyayêne. O wext embazê ma Kemal, Huseyîn û Nazim Babaoglu ameyê kiştene.”
‘Waştêne cuya xo ser o kitabêk binuso’
Muslum Yucelî îfade kerd ke wextêk ra pey o vîyart Stenbol û qiseykerdişê xo wina domna: “Tedayê ke serê ma de est bîyê, o wext Bayram tena buroyê Riha de mend. Dima Bayram şi Edene û dima ra ame Stenbol. Bayramî her ca de karê rojnamegerîye kerd. Sewbîna zî kovaranê tirkîyan de şîîrî nuştêne. 25 serrî xebitîya dima ra teqawit bi. No 7 serrî bi ke Belçîka de xebitîyayêne. Aşma nîsane de mi re mesaj erşawit û vat, ‘Ez vîrameyîşanê xo nusena.’ Derheqê vîrameyîşanê ma yê Riha de persî persa û waşt ke cuya xo ser o kitabêko weş binuso. Labelê çi heyf ke dinyaya xo bedelna.”
‘Bayram hem xebitîyayêne hem zî paştî dayêne embazanê xo’
Muslum Yucelî dîyar kerd ke Bayram Balciyî karê xo ra zaf hes kerdêne û wina dewam kerd: “Doktor û rojnamegerî eynê meslek ê. Doktor her tim xebitîyeno û saeta karê ci çin a. Rojnameger zî wina yo; şiro keye zî her tim karê xo ser o yo, yanî xebitîyeno. Bayram zî wina bi, her tim rojnamegerîye ser o xebitîyayêne. Stenbol de zî her tim wina bi. Bayram hem xebitîyayêne hem zî paştî dayêne embazanê xo.”
‘Wayîrvejîyayîşê Bayram Balciyî wayîrvejîyayîşê rojnamegerîye yo’
Muslum Yucelî peynîya qiseykerdişê xo de behsê karakter û kesayetê Bayram Balciyî kerd û nê çîyî vatî: “Wextê verênî de kurd û tirkîpîya xebitîyayêne. Çike sosyalîzm hişê her kesî de bi. Ma pîya kuçeyan de pîl bîyî, cuya ma zî eynî bîye. Kesê sey Bayram Balci xebitîyayêne û karê xo kerdêne. Wayîrvejîyayîşê vîrameyîş û xeyalanê Bayram Balciyî, tena bi domnayîşê kar û rojnamegerîye beno.”
