Parlamenterê Şirnexî Mehmet Zekî Îrmezî derheqê rayîrê mabênê Şirnex û Wanî de qsiey kerd ke 13 serrî yo nêqedîyeno û vat: “Seba rayîranê ewleyîye butçe pereyî est ê, la seba rayîranê komelî pereyî nêyenê erşawitiş.”
Şaristananê vakurî de demo ke babete bena leşkerî yan zî karêko ewleyî, dewlete pêro hêzê xo seferber kena û lazimtîyan ana ca. Na seferberî bi taybetî viraştişê rayîranê ewleyî de asena. Labelê demo ke babete bena rayîrê şarî û komelî bêxemîya ke yena mojnayene bi serran domîyena. Nê rayîran ra yew ke viraştişê ci bi serran o dewam keno, rayîrê mabênê Şirnex û Wanî yo. Dergîya rayîrê mabênê Şirnex û Wanî nika 450 kîlometre yo.
Serra 2013î de hetê dewlete ra seba kilmkerdişê rayîrê mabênê Wan û Şirnexî projeyêk ame amadekerdene û îhaleyê nê projeyî zî eyn serrî de ame kerdene. Eger no proje wextê xo de biameyêne temamkerdene, do nika dergîya rayîrê mabênê Şirnex û Wanî bibîyêne 180 kîlometre. Heta nika zaf reyî seba ke pereyê fîrmaya ke îhale girewto nêameyê dayene, proje ame betalkerdene. Tewr prynî di serrî ra ver îhaleyê nê rayîrî ame newekerdene, la ewro zî no rayîr ser o tu xebatêk nêyena kerdene.
Rayîro ke ganî 2 serran de biqedîyo, 13 serrî yo nêqedîyeno
Parlamenterê DEM Partî yê Şirnexî Mehmet Zekî Îrmezî derheqê rewşa viraştişê rayîrê mabênê Şirnex û Wanî de qisey kerd. Mehmet Zekî Îrmezî nêzdîbîyayîşê rayedaranê dewlete red kerd, dîyar kerd ke nika rayîrî ser o tu xebatêk nêyena kerdene û wina vat:
“Îhaleyê nê rayîrî serra 2013î de ame viraştene. Goreyê îhaleyê verênî ganî no rayîr 2 serran de biqedîyayêne. Nika nêzdîyê nê rayîrî de tu xebatêk çin a. Şarê ma hêvî keno ke rayîr lez biqedîyo. Demo ke no rayîr qedîya, seba bazirganîya şarê ma do zaf bi feyde bibo. Sewbîna no rayîr do wextê mabênê Wan û Şirnexî de 5 saetan ra bîyaro 2 saetan û do tesîrêko zaf weş û pozîtîf komelî ser o bikero.”
‘Demo ke babete bena komel her çî bedilîyeno’
Mehmet Zekî Îrmezî aşkera kerd ke demo ke babete bena ewleyî dewlete bilez gaman erzena û qiseykerdişê xo wina domna:
“Çi heyf ke demo ke babete bena karê komelkî, dewlete bilez tênêgçrena. La dewlete seba karanê ewleyî zaf bilez xebitîyena û nê karan lez qedênena. Seba qereqolan dewlete bilez gaman erzena û wextê xo de nê karan qedênena. La çi heyf ke demo ke babete bena şar û karê komelkî, her çî bedilîyeno.”
‘Ganî dewlete nê polîtîkayanê xo ra fek verada’
Mehmet Zekî Îrmez vera xemsarîya ke bi serran o dewam kena, reaksîyon mojna û qiseykerdişê xo wina qedêna: “Demo ke babbete bena karê dewlete butçe û pereyî est ê. Demo ke babete bena xizmetê şarî, vanê pereyî çin ê. Demo ke ma rayedaranê fîrmaya ke îhale girewto, înan ra persan kenî, ê zî ma ra vanê ke pereyî seba înan nêyenê erşawitiş û vanê pereyî çin ê. Ganî dewlete êdî nê polîtîkayanê xo yê lêminan ra fek verada û çîyo ke seba şarî lazim bo, wina gaman bierza.”
