Amed de des hezar merdimî seba azadîya fîzîkî ya Rayberê Şarê Kurdî Abdullah Ocalanî herikîyayî qadê mitîngî. Hemwelatîyê ke beşdarê mitîngî bîyî veng da dewlete ke bêyî ke prosesî erey fîna, ganî bilez gamanê şênberan bierza û wina vat: “Seba azadîya komelî ganî Serek Apo azad bibo.”
Bi pêşengîya DEM Partî, DBP û TJA Wan, Mêrsîn, Amed û Stenbol de seba azadîya fîzîkî ya Rayberê Şarê Kurdî Abdullah Ocalanî, bi sloganê “Bi Rayberîya Azade Ver Bi Komelo Demokratîk” mîtîngî ameyî viraştene. Qadanê mitîngî ra tewr qelebalîx û bi heybet qada Îstasyonî ya Amedî bîye û bi des hezaran hemwelatî beşdar bîyî.
Hemwelatîyê ke beşdarê mîtîngî bîyî dîyar kerd ke dewlete prosesî erey fînena û waşt ke no proses bilez netîce bigîro.
‘Komelo ke Rayberê ci esîr bo, o komel azad nîyo’
Hemwelatîyanê Amedî dîyar kerd ke heta Rayberê Şarê Kurdî Abdullah Ocalan azad nêbo, komel zî azad nêbeno û wina vat: “Komelo ke Rayberê ey esîr bo, o komel azad nîyo. Seba azadîya komelî ganî rayberê merdimî azad bibo. No mîtîng zî seba naye virazîyeno û ma heta nika qelebalîxêko winasîn nêdîyo. Vengdayîşê ma seba dewlete no yo ke ganî gaman bierza.”
‘Ma wazenî berê hepisxaneyan bêrê akerdene’
Hemwelatîyan da zaneyene ke şar bi fikrêko xurt aştî wazeno û nê çîyî vatî: “Ma wazenî Serekê ma azad bibo û berê hepisxaneyan bêrê akerdene. Serekê ma azad bibo do pêro Rojhelatê Mîyanên azad bibo. Çunke Serek Apo edalet û têduştîye wazeno; azadîya şaran girêdayeyê azadîya Serek Apo ya.”
