CPTya Kurdîstana Îraqî aşkera kerd ke dewleta tirkan bi şeş şertan fersend dana şarê 9 dewanê qezaya Zaxoyî ke agêrî dewanê xo.
Grûba Awankeranê Aştî (Community Peacemaker Team-CPT a Kurdîstana Îraqî) serê medyaya dîjîtale de beyanatêk vila kerd.
CPTyî eşkera kerd ke dewleta tirkan 26ê hezîrane ra dima bi 6 şertan fersend dayo ke şarê dewan agêrî keyeyanê xo. Nê dewî mîyanê Gelîyê Pîsaxa de yê ke girêdayeyê Îdareyê Xoser ê Zaxo yî.
Nameyê nê 9 dewan wina yo: “Bazangîra, Gundok, Gawrk, Krkrank, Patroma, Kalok, Marsîs, Alansh û Erey. Dewleta tirkan seba agêrayîşî şeş şertî dayê vernîya dewijan.”
Beyanat de ame vatene ke şarê nê dewan, semedê hêrişanê dewleta tirkan ra verê şeş serran keyeyê xo terk kerdbi. Dewîjî nêzdîyê aşmêk o ke seba agêrayîşê dewanê xo têkoşîn danî. Beyanat de şertê ke Tirkîya vernîya dewijan de ronayê wina ameyî rêzkerdene:
*Rojane saete 06.00ê şanî ra heta 19.00ê şandî dewijî eşkenê şêrî dewanê xo; la qet nêbeno ke saete 19.00ê şaandî ra pey tu kes dewe de bimano.
*Fersend nîyeno dayene ke tu kes çek û amûrê birnayîşî xo reyde bigêrno, heta çekê seydî zî qedexe yo.
*Dewîjî eşkenî werdê tena seba rojêk bigêrê xo het, werdê ke rojêk ra zafêr bo nêbeno ke înan het de bibo.
*Wextê vîyartişê nuqtayanê kontrolî yê artêşê tirkî de, nasnameyê her kesî yenî girewtene; name, adres û zanayîşê şexsî yenî qeydkerdene.
*Şoforî agêrayîşê pêro merdimanê ke zereyê wesayîta ey de yê berpirsîyar yeno vînayene. Wextêo ke şand agêrayî, eger kesêk înan reyde nêagêro, o wext şofor hetê leşkeranê tirk ra yeno destbendkerdene.
*Leşkerê tirkî qeydanê dîjîtalan ê sazgehanê xo yê ewleyî de, vîyarteyê dewijan gêrenî; eger dewijî wextê verênî de bi paştîdayîşê gerîlayan ameybî sucdarkerdene, înan destbend kenî.
Sewbîna beyanatî de vîdeoyê hêrişanê artêşa tirk a zereyê bananê dewa Marsîsî zî ame vilakerdene.
